MINISITIRI W’UBUREZI YATANGIJE IGIHEMBWE CY’IHINGA A 2027 MU GISHANGA CYA BUSOGWE

Tariki ya 10 Ukwakira 2026, Minisitiri w’Uburezi, Dr. NSENGIMANA Joseph, yatangije igihembwe cy’ihinga A 2027 mu gishanga cya Busogwe gifite hegitari 95, gihuriweho n’Imirenge ya Busasamana, Kigoma na Mukingo, mu gikorwa cy’Umuganda cyitabiriwe n’abayobozi mu nzego zitandukanye n’abaturage.

Iki gikorwa cyitabiriwe kandi n’Umunyamabanga Uhoraho muri MINEMA, Bwana A. Ngoga, Umunyamabanga Nshingwabikorwa w’Intara y’Amajyepfo, Bwana NSHIMIYIMANA Vedaste, Umuyobozi w’Akarere ka Nyanza w’Agateganyo, Bwana KAJYAMBERE Patrick, Umuyobozi Mukuru ushinzwe Itumanaho muri MINEDUC, inzego z’umutekano n’Abanyamabanga Nshingwabikorwa b’Imirenge ya Busasamana, Kigoma na Mukingo.

Abitabiriye Umuganda bakoze ibikorwa birimo gucukura imyobo yo guteramo imbuto, gushyiramo ishwagara n’ifumbire y’imborera n’imvaruganda, gutera imbuto y’ibigori no gusibanganya imyobo. Hanakozwe ibikorwa byo kubungabunga ubutaka no guteza imbere ubuhinzi burengera ubutaka, ndetse no kuhira imyaka hakoreshejwe imashini.

Mu butumwa bwe, Minisitiri w’Uburezi, Dr. NSENGIMANA Joseph, yasabye abahinzi guhinga ubutaka bwose buboneka, gushyira imyaka mu bwishingizi no kubahiriza amabwiriza y’ubuhinzi burengera ubutaka, hagamijwe kugera ku musaruro wa toni 10 z’ibigori kuri hegitari.

Yashimiye abaturage bitabiriye iki gikorwa, abasaba kandi kurushaho kwitabira gahunda za Leta, zirimo kwishyura ubwisungane mu kwivuza, no kwita ku isuku y’umubiri, iy’imyambaro, iy’ingo n’ahantu hahurira abantu benshi.