I NYANZA TWATARAMYE XII: IBYISHIMO BISENDEREYE KU BITABIRIYE IGITARAMO NDANGAMUCO

Ku Ngoro y’Amateka y’Abami i Nyanza habereye igitaramo ndangamuco nyarwanda “I Nyanza Twataramye”, cyabaye ku nshuro ya 12, cyongera kugaragaza umwihariko wa Nyanza nk’igicumbi cy’amateka, umuco n’indangagaciro nyarwanda.

Iki gitaramo cyateguwe mu rwego rwo gusigasira no guteza imbere umuco nyarwanda, cyitabirwa n’Umushyitsi Mukuru, Minisitiri w’Ubutegetsi bw’Igihugu, Bwana Habimana Dominique, ari kumwe na Guverineri w’Intara y’Amajyepfo, Madamu Kayitesi Alice, abayobozi b’Uturere, inzego z’umutekano ndetse n’abafatanyabikorwa.

Mu butumwa bwatanzwe, Minisitiri Habimana Dominique yashishikarije Abanyarwanda gukomeza gusigasira umuco nyarwanda no kuwutoza abakiri bato, bawuhuze n’indangagaciro zubaka igihugu, zirimo gukunda umurimo, ubumwe n’ubwitange mu iterambere.

“Umuco ni umusingi w’ubumwe n’iterambere ry’igihugu. Tugomba kuwusigasira, kuwutoza urubyiruko no kuwukoresha mu kubaka u Rwanda twifuza, rufite Abanyarwanda bakunda umurimo, bubahana kandi babana mu bumwe.” — Minisitiri w’Ubutegetsi bw’Igihugu, Habimana Dominique.

Igitaramo cyaranzwe n’ibikorwa bitandukanye byagaragaje ubwiza n’ubukungu bw’umuco nyarwanda. Abitabiriye bagize amahirwe yo kwishimira umwiyereko w’Inyambo no kuzivuga amazina, imbyino z’Itorero Isonga n’Itorero Urugangazi, ndetse n’abahanzi batandukanye.

Mu basusurukije abitabiriye harimo Umukirigitananga, Nzayisenga Sophie, Symphony Band na Riderman, mu ndirimbo n’imbyino byatumye i Nyanza harangwa ibyishimo n’umwuka w’ubusabane.

UMUCO WAHUJWE N’URUKUNDO RW’UMUPIRA W’AMAGURU

Ibyishimo byarushijeho kwiyongera ubwo abitabiriye “I Nyanza Twataramye” bakurikiranaga umukino wa nyuma wa CECAFA Kagame Cup, wahuje Rayon Sports yo mu Rwanda na Gor Mahia yo muri Kenya.

Rayon Sports yegukanye igikombe nyuma yo gutsinda Gor Mahia ibitego 2-1, intsinzi yakiriwe n’abaturage n’abayobozi bari bateraniye i Nyanza mu Rukari mu byishimo byinshi.

Kuri uwo mugoroba, umuco, ubusabane n’urukundo rw’umupira w’amaguru byahurijwe hamwe, bituma i Nyanza haboneka umwanya wihariye wo kwizihiza indangagaciro z’u Rwanda no kwishimira intsinzi y’ikipe ihagarariye igihugu kandi ikomoka i Nyanza.

“I Nyanza Twataramye” imaze kuba igikorwa ngarukamwaka gikomeye mu guteza imbere umuco nyarwanda, guteza imbere ubukerarugendo bushingiye ku mateka n’umuco, ndetse no guhuriza hamwe Abanyarwanda mu mwuka w’ubusabane n’ibyishimo.

Igitaramo cy’uyu mwaka cyasize ubutumwa bw’uko umuco ari ishema ry’Abanyarwanda, ubumwe bukaba imbaraga, naho gukunda umurimo bikaba inkingi y’iterambere rirambye.