HIZIHIJWE UMUNSI MUKURU KWIBOHORA KU NSHURO YA 32, HATAHWA IBIKORWA BY'ITERAMBERE

Kimwe n'ahandi hose mu gihugu, tariki 4 Nyakanga 2026 mu Mirenge yose y'Akarere ka Nyanza hizihijwe Umunsi Mukuru wo Kwibohora ku nshuro ya 32 ku nsanganyamatsiko igira iti: "Kwibohora: Intambwe mu Ntego." Ku rwego rw'Akarere, ibirori byabereye kuri Sitade ya Nyanza mu Murenge wa Busasamana, byitabirwa n'Umuyobozi w'Agateganyo w'Akarere ka Nyanza, Bwana KAJYAMBERE Patrick, wari umushyitsi mukuru, hamwe na Mufti w'u Rwanda, Sheikh Mussa Sindayigaya, abayobozi mu nzego zitandukanye ndetse n'abaturage benshi.

Mbere y'ibirori, hatashywe ibikorwa bitandukanye by'iterambere. Ku rwego rw'Akarere hatashywe Inzu Ndangamurage y'Ikawa (Coffee Museum), ubuhunikiro bw'umusaruro bwakira toni 5000, inyubako y'ubucuruzi (Ashukur Trading Complex Mugandamure), amashuri n'ibindi.

Mu yindiMirenge y'Akarere hatashywe ibikorwa bifitiye abaturage akamaro birimo amashuri, inzu zubakiwe abatishoboye, amateme n'ibindi bikorwa remezo bikomeje guteza imbere imibereho myiza n'iterambere ry'abaturage. Ibirori byaranzwe n'ibyino gakondo, indirimbo, imivugo n'imikino itandukanye.

Umuyobozi w'Akarere ka Nyanza, Bwana KAJYAMBERE Patrick, yagarutse ku mateka yo Kwibohora, agaragaza uruhare rw'Inkotanyi mu kubohora igihugu no guhagarika Jenoside yakorewe Abatutsi mu 1994. Yasabye abaturage gukomeza gusigasira ibyagezweho, kubyongera no gukomeza kugira uruhare mu rugendo rw'iterambere, kugira ngo u Rwanda rukomeze kuba intangarugero mu miyoborere myiza n'iterambere. Umunsi wagenze neza.