Mu rwego rwo gukomeza kwibuka no guha icyubahiro abazize Jenoside yakorewe Abatutsi, Umuryango Unity Club Intwararumuri wifatanyije n’Ababyeyi b’Intwaza bo mu Rugo rw’Impinganzima rwa Nyanza ruherereye i Mushirarungu, mu Murenge wa Rwabicuma, mu gikorwa cyo kwibuka imiryango yabo yishwe muri Jenoside.

Muri iki gikorwa, hibutswe abantu 527 bari bagize imiryango y’Intwaza 34, bashyizwe mu bikorwa byo kurimbura Abatutsi. Iki gikorwa cyari kirimo urusobe rw’abayobozi n’abaturage baje kwifatanya n’Intwaza mu rugendo rwo kwibuka, kunamira no gushimangira icyizere cy’ubuzima.

Umushyitsi mukuru yari Hon. Uwacu Julienne, Umunyamabanga Nshingwabikorwa wa Unity Club Intwararumuri. Yari aherekejwe n’abandi bayobozi barimo Madame Kayitesi Nadine, Umuyobozi w’Akarere ka Nyanza Wungirije Ushinzwe Imibereho Myiza y’Abaturage, Madame Kayitesi Immaculée, Perezida wa AVEGA-AGAHOZO, Maj Frank Mugisha uyobora Inkeragutabara mu Karere ka Nyanza, Bwana Niyitegeka Jean Baptiste, Perezida wa IBUKA mu Karere, hamwe n’abahagarariye Police, RCS, DASSO, urubyiruko rw’abanyeshuri n’abaturanyi b’uru rugo.

Igikorwa cyaranzwe n’umwanya wo kwibuka, gucana urumuri rw’icyizere, gutanga ubutumwa butandukanye burimo iry’umuyobozi w’Akarere Wungirije, irya AVEGA-AGAHOZO, ubuhamya bw’abarokotse, ubutumwa bwa IBUKA, ndetse n’ijambo ry’Umushyitsi Mukuru.

Mu butumwa butandukanye, abitabiriye bashimiye abarokotse Jenoside, by'umwihariko Intwaza, ku butwari, kwihangana no kudacika intege bagaragaje. Bashimye kandi Ubuyobozi bw’u Rwanda burangajwe imbere na Nyakubahwa Perezida wa Repubulika n’Umufasha we, ku rukundo n’ubwitange bwo gukomeza kwita ku barokotse.

"Kwibuka si ugusubira mu gahinda, ni uguhamya ko abarokotse bafite ejo hazaza, ko igihugu cyahisemo kuba icy’ukuri, icy’ubumwe n’icyizere. Intwaza ni urugero rudasanzwe rw’imbaraga z’umutima n’ukuri kugaragaza agaciro k’umuntu," — Hon. Uwacu Julienne.

“Ntibazimye ahubwo basize umurage”

Abari aho bibukijwe ko nubwo ababo bishwe, batazimye, kuko basize umurage ukomeye uzakomeza kuba urumuri ku rubyiruko, rutozwa indangagaciro zo gukunda igihugu, kubana mu mahoro no kurwanya ivangura iryo ari ryo ryose.