Ku bufatanye na Unity Club Intwararumuri, tariki ya 11 Gicurasi 2023, muri Kaminuza ya UNILAK ishami rya Nyanza hatangirijwe icyiciro cya Gatatu cy'amarushanwa n'ibiganiro kuri Ndi Umunyarwanda mu mashuri makuru na kaminuza ku nsanganyamatsiko igira iti: "Ndi Umunyarwanda: Igitekerezo ngenga cyo kubaho kwacu".

Iyi gahunda yitabiriwe n'Umuyobozi w'Akarere Bwana Ntazinda Erasme, itsinda ry'abanyamuryango ba Unity Club Intwararumuri riyobowe na Madamu Rwabuhihi Josephine, Intumwa ya Minisiteri y'urubyiruko Bwana Nzigiyimana Gilbert, Uhagarariye MINUBUMWE Bwana Nikuze Donatien, Umuyobozi wa UNILAK Nyanza Dr Mukandori Denyse, abanyeshuri ba UNILAK ndetse na College Maranatha.

Aya marushanwa kuri Ndi Umunyarwanda akazakorwa mu mivugo n'indirimbo mu gihe cy'iminsi 30 aho abakoze ibihangano bazabitanga k u mboni za Ndi Umunyarwanda. Aya marushanwa akaba afasha kwimakaza ubumwe n'ubudaheranwa bw'Abanyarwanda.

Mu Kiganiro batanze batanze, bamwe mu rubyiruko bagaragaje amateka atandukanye banyuzemo aturuka ku ngaruka za Jenoside yakorewe Abatutsi mu 1994 ariko bakaba barakize ibikomere ndetse bakaba bakomeje kwiyubaka muri gahunda ya Ndi Umunyarwanda nyuma yo kwakira ibyababayeho.

Mu butumwa bwe, Umuyobozi w'Akarere yashimiye Unity Club Intwararumuri ku kuba barateguye ibiganiro kuko bifasha mu guhangana n'ingebitekerezo ya Jenoside mu rubyiruko. Yasabye urubyiruko ko umuntu wese uzabigisha urwango bazamubaza aho arukura kuko Leta yacu yigisha urukundo. Yabasabye kujya basesengura bakumva niba ibyo babwirwa bishyigikira Ndi Umunyarwanda, bakarushaho gufatanya kugira ngo bagere kuri byinshi.

Ubutumwa bw'Umushyitsi mukuru bwagarutse ku gushimira buri wese by'umwihariko urubyiruko rwitabiriye iyi gahunda. Ati: "Rubyiruko bana bacu, iyo tubareba turishima tukagira icyizere cy'ejo hazaza. Rero muhagarare bwuma. Ibyo twaciyemo nk'Igihugu kandi duhangana nabyo ni byinshi ariko bikwiye kubatera umwete wo  wo gukora cyane." Yabasabye gukomeza  kubaka ubunyarwanda bihereye kuri bo ubwabo  nk'urubyiruko kandi bakirinda kwirara. Gautangiza aya marushanwa ndetse na Club z'ubumwe n'ubudaheranwa byagenze neza.

Abayobozi batandukanye bari bitabiriye gahunda yo gutangiza ibiganiro n'amarushanwa kuri Ndi Umunyarwanda

Rwabuhihi Josephine wari umushyitsi mukuru muri iki gikorwa ageza ijambo ku bitabiriye

Umuyobozi w'Akarere Ntazinda Erasme ageza ijambo ku bitabiriye gahunda yo gutangiza amarushanwa

Bamwe mu rubyiruko bakize ibikomere by'amateka batanze ubuhamya ku byiza bya Ndi Umunyarwanda

Abanyeshuri ba UNILAK Nyanza barimo n'abanyamahanga nabo bitabiriye iyi gahunda