Tariki 17 Ugushyingo 2025, Umuyobozi w’Akarere ka Nyanza w’Agateganyo, Bwana Kajyambere Patrick, yayoboye inama y’ubukangurambaga kuri gahunda ya Ejo Heza, yitabiriwe n’amakoperative, abikorera, Abanyamabanga Nshingwabikorwa b’imirenge ndetse n’abashinzwe ishoramari n’umurimo, ari nabo bakurikirana uyu muhigo ku rwego rw’Akarere. Inama yari igamije kureba ishyirwa mu bikorwa rya gahunda ya Ejo Heza mu mwaka wa 2025–2026 no gufata ingamba zo kongera umubare w’abizigamira.

Mu ijambo rye, Bwana Kajyambere Patrick yashimye uruhare rw’abafatanyabikorwa bose mu guteza imbere umuco wo kwizigamira, anasaba ko ubukangurambaga bwakomeza. Yagize ati: “Ejo Heza ni igitekerezo kirambye gituma umuturage agira icyizere cy’ubuzima bw’ejo. Dukeneye gufatanya kugira ngo abaturage benshi barusheho kwizigamira.”

Muri iyi nama hanatanzwe ishimwe ku mirenge n’amakoperative yitwaye neza muri Ejo Heza mu mwaka wa 2024–2025. Umurenge wa Busasamana akaba ari wo wahize indi mirenge mu byiciro byose kubera imikorere myiza no kwegera abaturage.

Umunyamabanga Nshingwabikorwa w’Umurenge wa Busasamana yashimangiye ko abaturage bamaze gusobanukirwa akamaro ko kwizigamira. Yagize ati: “Abaturage bacu bamaze kubona ko kwizigamira ari umusingi w’umutekano w’ejo hazaza. Tubegera buri munsi, tubasobanurira kandi tubakurikirana, bituma umusaruro wiyongera. Turakomeza gukora cyane kugira ngo Busasamana ikomeze kuba indashyikirwa muri Ejo Heza.”