Ku bufatanye bw’Akarere ka Nyanza, Water For People na sosiyete mpuzamahanga LIXIL, hatangijwe ku mugaragaro igikorwa cyo gutanga ubwiherero bwa SATO 30,000, mu muhango wabereye ku Kigo cy’Akarere cy’Isuku n’Isukura giherereye ku isoko rikuru rya Nyanza. Iki gikorwa kigamije kunoza isuku n’isukura, by’umwihariko mu mashuri, no guteza imbere ubuzima bwiza bw’abanyeshuri n’abarezi.

Iki gikorwa cyaranzwe no kwerekana ibikoresho byifashishwa muiku n’isukura, gutanga ubutumwa bw’ubukangurambaga ku isuku n’isukura mu baturage, ndetse no gutangiza ibikorwa byo kubaka ubushobozi ku bufatanye n’inzego zitandukanye. Abitabiriye iki gikorwa bagaragarijwe akamaro ko gukoresha ubwiherero bugezweho mu gukumira indwara ziterwa n’umwanda no kwimakaza umuco w’isuku.

Iki gikorwa ni igice cy’ubufatanye mpuzamahanga hagati ya LIXIL na Water For People, bugamije kugeza ibisubizo birambye by’isuku ku banyeshuri biga mu mashuri atandukanye. Binyuze mu bikoresho bya SATO, amashuri akazahabwa ubwiherero bufite ireme, buhendutse kandi bworoshye kubwubaka no kubwifashisha, bigafasha kugabanya umwanda no kongera isuku.

Ishuri rya ES Nyanza, rimaze imyaka itatu rikoresha ubwiherero bwa SATO, ryerekanye ko ubu bwiherero bwagize uruhare rukomeye mu kongera isuku, kurengera ubuzima bw’abanyeshuri no guhindura imyitwarire yabo ku bijyanye n’isukura.