Tariki 18 Ukoboza 2025, mu rugo rw’Impinganzima ya Nyanza habereye igikorwa cyihariye cyo kwifuriza ababyeyi b’Intwaza Noheli n’umwaka mushya muhire wa 2026, mu mwuka w’urukundo, ubumwe n’icyubahiro. Iki gikorwa cyateguwe na Unity Club Intwararumuri ku bufatanye n’inzego zitandukanye, kikaba cyaritabiriwe n’abashyitsi b’ingeri zinyuranye.

Umushyitsi Mukuru yari Nyakubahwa Nyirahabimana Solina, afatanyije n’abayobozi b’Akarere ka Nyanza barangajwe imbere n’Umuyobozi w’Akarere w’Agateganyo, Bwana Kajyambere Patrick, intumwa ya Minubumwe, abahagarariye AVEGA, inzego z’umutekano ndetse n’abaturage baturanye n’Urugo rw’Impinganzima bigaragaza ko kwita ku barokotse Jenoside yakorewe Abatutsi, by’umwihariko abakuze, ari inshingano ihuriweho.

Ibikorwa byaranzwe n’indirimbo z’abana zagaragazaga icyizere n’urukundo, amagambo y’ihumure yagarukaga ku mateka n’agaciro k’Intwaza, ndetse n’itangwa ry’impano za Noheli ku babyeyi batujwe muri uru rugo. Abayobozi bagarutse ku ruhare rukomeye rwa Nyakubahwa Perezida wa Repubulika n’Umufasha we mu guharanira imibereho myiza y’abarokotse Jenoside, by’umwihariko binyuze mu gushyiraho Impinganzima zibafasha gusaza neza mu mutuzo, mu cyubahiro no mu muryango ubitaho.

Abitabiriye uyu muhango bashimiye Unity Club Intwararumuri n’abandi bafatanyabikorwa ku bikorwa by’urukundo bikomeje guha Intwaza icyizere n’icyubahiro. Banabifurije iminsi mikuru myiza yuzuyemo amahoro, ubuzima bwiza n’urukundo.