Tariki ya 24 Ukwakira 2025, mu cyumba cy’inama cy’Akarere ka Nyanza, hateraniye inama y’Ihuriro ry’Ubumwe n’Ubudaheranwa ku rwego rw’Akarere, ifite insanganyamatsiko igira iti “Twimakaze Ubumwe n’Ubudaheranwa.” Ni umunsi waranzwe n’ubusabane, ibiganiro byimbitse n’ubutumwa bwubaka bugamije gushimangira indangagaciro z’u Rwanda rushya rwunze ubumwe.

Umushyitsi mukuru yari Perezida w’Inama Njyanama y’Akarere, Madamu Mukagatare Judith, ari kumwe n’abayobozi batandukanye barimo Abajyanama, Komite Nyobozi, inzego z’umutekano, abahoze ari abayobozi, abanyeshuri, abahagarariye amadini, imiryango nka IBUKA, AVEGA, n’abandi bafatanyabikorwa b’Akarere.

Mu ijambo ry’ikaze, Umuyobozi w’Akarere, Bwana Kajyambere Patrick, yibukije ko ubumwe n’ubudaheranwa ari inkingi y’iterambere rirambye, asaba buri wese kubibungabunga no kubishyira mu bikorwa mu buzima bwa buri munsi. Yagaragaje ko iterambere nyaryo ritagerwaho hatabayeho gufatanya no kubana neza nk’Abanyarwanda.

Madamu Mukagatare Judith, mu gutangiza ku mugaragaro inama, yagarutse ku kamaro ko kubaka ubumwe bushingiye ku ndangagaciro za “Ndi Umunyarwanda”, asaba abari aho gukomeza kurwanya amacakubiri no kurwanya ingengabitekerezo ya Jenoside aho yava hose.

Inama yaranzwe n’ibiganiro byimbitse, birimo ikiganiro nyunguranabitekerezo ku rugendo rw’Ubumwe n’Ubudaheranwa, aho abitabiriye basuzumye intambwe imaze guterwa n’inzitizi zikibangamiye uru rugendo. Hon. Nyirabega Euthalie yatanze ikiganiro gishishikaje ku mateka ya Pan-Africanism, agaragaza ko kwishyira hamwe, gukunda igihugu no gukorera hamwe ari byo bizatuma Abanyafurika bagera ku kwigira nyakuri.

Abitabiriye inama bunguranye ibitekerezo ku buryo bwimbitse, bahuriza ku cyifuzo cyo gukomeza gukorera hamwe, gufatanya mu bikorwa byubaka no kurushaho kwimakaza ubumwe n’ubudaheranwa mu Karere ka Nyanza.