Tariki 3 Ukuboza 2025, kuri Sitade ya Nyanza habereye ubukangurambaga bwahuje abamotari, abanyonzi, Polisi y’u Rwanda, RSSB n’ubuyobozi bw’Akarere ka Nyanza, hagamijwe gukumira impanuka zo mu muhanda no gushishikariza abikorera ku giti cyabo kwizigamira binyuze muri gahunda ya Ejo Heza. Iyi gahunda yibanze ku guhindura imyumvire no kongerera abitabiriye ubumenyi ku myitwarire iboneye n’imyitwarire irinda ubuzima.

Umuyobozi w’Imirimo Rusange mu Karere, Bwana Nsabimana Jean Christian, yashimye ubufatanye bw’inzego zose, agaragaza ko ubukangurambaga nk’ubu bugira uruhare rufatika mu kugabanya impanuka no guteza imbere umutekano wo mu muhanda. Abitabiriye baganirijwe ku kamaro ko kubahiriza amategeko n’indangagaciro z’ubushishozi mu gutwara, bigamije kurengera ubuzima bwabo n’abandi bose bakoresha umuhanda.

Ku bijyanye n’iterambere ry’ubukungu bw’umuturage, Bwana Kayumba Bernard, ushinzwe ubukangurambaga muri Ejo Heza ku rwego rw’igihugu, yasobanuye uko kwizigamira ari igikoresho cyizewe cyo guteganyiriza ejo hazaza, anamenyekanisha gahunda ya IREMERE. Ibi byahaye abitabiriye ibisubizo bifatika by’uko bashobora kwihesha agaciro, kwiteganyiriza, no kwizera ko imibereho yabo izakomeza kugenda neza.

Abitabiriye biyemeje guhindura imyitwarire, kwiyandikisha muri Ejo Heza, no gukomeza kwamamaza ubutumwa bwa “Tugendane, Tugereyo Amahoro.”