Mu karere ka Nyanza, hakozwe umuhango w’ihererekanyabubasha mu mirenge itandukanye, ugamije gusigasira umuco wo guhererekanya inshingano mu buryo buboneye, kunoza imikorere y’inzego z’ibanze no kurushaho kwimakaza ubufatanye n’ubunyamwuga. Uyu muhango witabiriwe kandi uyoborwa n’Umuyobozi w’Akarere ka Nyanza w’agateganyo, Bwana Kajyambere Patrick, ari kumwe n’abayobozi b’inzego zitandukanye, abakozi b’imirenge ndetse n’abaturage.

Mu Murenge wa Rwabicuma, Madamu Niwemwana Immaculée yahaye inshingano Bwana Kayigyi Ange Claude wimuriwe muri uyu murenge. Ni umuhango waranzwe n’umutuzo, ubwitange n’ubufatanye. Mu butumwa bwe, Madamu Niwemwana yagize ati: "Ubuyobozi ni umurage ushingiye ku bufatanye n’icyizere. Gusimburana ku nshingano ntibivuze gutangira bushya, ahubwo ni ugukomeza inzira y’ubwitange no guharanira iterambere ry’abaturage."

Ku ruhande rwe, Bwana Kayigyi Ange Claude, nk’umuyobozi mushya wa Rwabicuma, yashimangiye ko yiteguye gukorera abaturage abicishije mu bufatanye n’imikoranire myiza, agira ati: "Ndashimira icyizere ubuyobozi bw’Akarere  bukomeje kungirira, kandi nzaharanira gukomeza ibikorwa byiza byatangiye, nshyira imbere iterambere ry’abaturage n’imiyoborere iboneye." Hanabaye kandi ihererekanyabubasha ku bandi bakozi bimuwe bava cyangwa bajya muri Rwabicuma.

Nyuma yaho, ibikorwa byakomereje mu Murenge wa Mukingo, aho Abanyamabanga Nshingwabikorwa ba Mukingo na Rwabicuma basimburanye mu mirenge yabo, bigaragaza imikoranire myiza mu guhererekanya inshingano.

Ku rundi ruhande, mu Murenge wa Kigoma habereye ihererekanyabubasha hagati ya Bwana Cyambari Jean Pierre wasimbuwe na Bwana Murenzi Valens wavuye mu Murenge wa Kibirizi. Bwana Murenzi nawe yahaye inshingano Bwana Burezi Eugène wavuye mu Murenge wa Cyabakamyi, ari nako Bwana Burezi ahererekanya ububasha na Bwana Cyambari mu murenge wa Cyabakamyi. Ibi byakozwe mu mucyo kandi hanabaye ihererekanyabubasha ku bandi bakozi bahinduriwe aho bakoreraga.

Mu ijambo rye, Bwana Kajyambere Patrick yashimye uko ihererekanyabubasha ryateguwe neza, asaba abayobozi n’abakozi bose gukorera hamwe, gushyira imbere inyungu z’abaturage no guharanira kwesa imihigo. Yabibukije ko ubuyobozi bw’Akarere buzakomeza kubaba hafi no kubashyigikira mu rugendo rwo guteza imbere imirenge, binyuze mu bufatanye n’ubunyamwuga.