Ku bufatanye na ActionAid, tariki 10 Ukuboza 2025, Akarere ka nyanza kasoje ubukangurambaga bw’iminsi 16 yo kurwanya ihohotera rishingiye ku gitsina n’icuruzwa ry’abantu. Igikorwa cyabereye mu Murenge wa Busasamana, Akagari ka Kavumu, ku nsanganyamatsiko igira iti: “Twubake umuryango uzira ihohotera.” Umushyitsi mukuru yari Umuyobozi w’Akarere w’agateganyo, Bwana Kajyambere Patrick, ari kumwe n’abayobozi, inzego z’umutekano n’abafatanyabikorwa.

Umunsi waranzwe n’ubutumwa bukomeye ku gukumira ihohotera, ubuhamya bw’imiryango ibanye neza, n’imbyino zagaragaje ingaruka mbi z’ihohotera ku buzima bw’umuryango. Hanashyigikiwe abakobwa babyaye bataruzuza imyaka y’ubukure binyuze mu kubaha ibikoresho by’isuku, hagaragazwa icyo kurwanya ihohotera bisaba no kurengera abahuye n’ingaruka zabyo.

Mu ijambo rye, Bwana Kajyambere Patrick yashimye abafatanyabikorwa n’abaturage, asaba ko ubutumwa bw’iyi minsi 16 bukomeza kugera hose mu miryango, mu midugudu no mu bigo. Yashimangiye ko umuryango utekanye, uzira ihohotera n’amakimbirane, ari wo shingiro ry’iterambere rirambye.