Mu kagari ka Gishike, Umurenge wa Rwabicuma, abaturage n’abayobozi bizihije Umunsi Mpuzamahanga w’Umuryango mu birori byaranzwe n’ibikorwa by’ubwitange, ibiganiro byubaka n’ubusabane. Uyu munsi wizihijwe ku nsanganyamatsiko igira iti: “Ibiganiro byiza, ireme ry’umuryango”, igamije gushimangira uruhare rw’itumanaho ryiza mu kubaka umuryango utekanye.

Ibirori byatangijwe n’umuganda rusange wo gutunganya imihanda y’imigenderano mu mudugudu wa Gakoni, aho abaturage bifatanyije n’abayobozi mu bikorwa byo gukora isuku y'imihanda ifasha imiryango kugera ku bikorwa remezo no koroshya imibereho ya buri munsi.

Madamu Kayitesi Nadine, Umuyobozi w’Akarere wungirije ushinzwe iterambere ry’imibereho myiza y’abaturage, ni we wari umushyitsi mukuru muri ibi birori. Mu ijambo rye, yashimangiye ko umuryango ari igicumbi cy’iterambere, asaba buri muturage kugira uruhare mu kuwurinda no kuwuteza imbere.

Yagize ati: “Umuryango ni ryo shingiro ry’igihugu. Iyo umuryango ufite amahoro, ubumwe n’ubwumvikane, igihugu kirubakwa kigakomera. Tugomba gushyira imbere ibiganiro byubaka, tugakemura ibibazo mu mahoro, tukirinda amakimbirane ashobora gusenya urugo n’ahazaza h’abana.”
 

Abaturage bibukijwe inshingano zabo mu kurinda umuryango, kurwanya ihohoterwa rishingiye ku gitsina, no guteza imbere uburere bufite ireme. Hanatanzwe ubutumwa bushimangira ko buri wese, yaba umugabo, umugore cyangwa umwana, afite uruhare mu kubaka urugo rwuzuyemo urukundo n’ubwubahane.

Ibi birori byabaye umwanya wo guha ijambo abaturage, basangiza abandi ubuhamya bw’uko ibiganiro byiza n’imibanire myiza byagize uruhare mu guteza imbere imibereho yabo. Harimo n’abafashijwe kwiyunga nyuma y’amakimbirane yo mu miryango, binyuze mu bufatanye n’inzego z’ubuyobozi.

Uko imyaka igenda ihita, Umunsi Mpuzamahanga w’Umuryango ugaragaza ko gushyira imbere umuryango utekanye ari inkingi y’imibereho myiza n’iterambere rirambye ry’igihugu. Akarere ka Nyanza, binyuze mu bufatanye n’inzego zitandukanye, gakomeje guharanira ko buri rugo ruba ahatangirira icyizere cy’ejo hazaza.