Tariki  ya 30 Nzeri 2021, mu Karere ka Nyanza hatangijwe ku mugaragaro igihembwe cy'ihinga 2022A. Ku rwego rw'Akarere byabereye mu murenge wa Ntyazo, Akagari ka Katarara, Umudugudu wa Muhero kuri Site ya Nyacyonga. Iyi site ikaba itunganyijweho amaterasi y'indinganire ku buso bwa hegiteri 40. Hakaba hatewe ibigori ndetse n'ubwatsi bw'amatungo kuri hegiteri 21.

Umushyitsi mukuru muri iki gikorwa yari Guverineri w'Intara y'Amajyepfo Madame Kayitesi Alice wari kumwe n'Umuyobozi w'Akarere ka Nyanza Bwana Ntazinda Erasme, Umuyobozi w'Akarere wungirije ushinzwe iterambere ry'ubukungu Bwana Kajyambere Patrick, Perezida wa Komisiyo y'ubukungu mu Nama Njyanama y'Akarere Bwana Munyantore Jean Bosco, abahagarariye inzego z'umutekano mu Karere harimo ingabo, Police, NISS na DASSO ndetse n'abaturage.

Mu ijambo ry'ikaze, Umuyobozi w'Akarere ka Nyanza yashimiye abaturage b'umurenge wa Ntyazo ko bakunda umurimo kandi bakaba bahinga neza bakeza ndetse uyu murenge ukaba ari ikigega cy'Akarere.  Yabasabye Kudatezuka ku murimo bagakomeza kwirinda icyorezo cya COVID-19 kandi bakarushaho gukunda umurimo no kuwunoza.

Umuhinzi uhagarariye abandi, Munyampeta Gerard yashimiye ubuyobozi bwifatanyije n'abaturage b'umurenge wa Ntyazo mu gutangiza igihembwe cy'ihinga. Yagize ati: " Turashimira cyane u uyobozi bwacu ko butugezaho imbuto n'ifumbire ku gihe kandi turabashimira ko mwadukoreye amaterasi  y'indinganire kuko azadufasha kongera umusaruro". 

Guverineri w'Intara y'Amajyepfo yashimiye abahinzi bo mu murenge wa Ntyazo by'umwihariko abibumbiye muri Koperative ya KOAMANYA ko ari intore zishakira ibisubizo. Yabasabya kandi gukomeza gukoresha inyongeramusaruro kandi bakaba imboni z'umupaka n'abarinzi b'inkiko, bikazagaragarira abandi ko umuhinzi ubikora neza ashobora kuba umusemburo w'iterambere n'impinduka nziza.

Abahinzi benshi bari bitabiriye iki gikorwa

Hatewe imbuto y'ibigori ku buso bwa ha 21

Guverineri Kayitesi Alice n'Umuyobozi w'Akarere ka Nyanza batera ibigori

Abajyanama b'ubuhinzi bari bitabiriye iyi gahunda

Umuhinzi uhagarariye abandi yashimiye ubuyobozi ko bubagezaho inyongeramusaruro ku gihe

Guverineri yasabye abahinzi b'i Ntyazo guhinga kinyamwuga