Ku bufatanye na Bralirwa mu ishami ryayo rya Heiniken, tariki ya 17 Ugushyingo 2023, mu murenge wa Muyira, Akagari ka Nyamure, Umudugudu wa Kanyundo, habereye umunsi ngarukamwaka wo gutera igiti ku rwego rw'Akarere wahujwe n'umuganda ngarukagihembwe w'urubyiruko n'uruzinduko rwa Hon. Senateri Mupenzi George na Hon Depite Nyirabega Eutalie babarizwa mu Ihuriro Nyafurika ryo kurwanya ruswa n'akarengane (APNAC-Rwanda). Hakaba hatewe ibiti bivangwa n'imyaka ndetse n'ibiti by'imbuto ziribwa hanabaho gahunda yo gukangurira abaturage kwirinda no kureba niba nta bahuye na ruswa cyangwa akarengane.

Abitabiriye uyu muganda ni Hon. Senateri George Mupenzi ari nawe mushyitsi mukuru, Hon Depite Euthalie Nyirabega, Umuyobozi w'Akarere ka Nyanza Bwana NTAZINDA Erasme, Umuyobozi Mukuru wa RFA, Dr Concorde Nsengumuremyi, Umuyobozi Mukuru ushinzwe imirimo rusange  n'itumanaho muri BRALIRWA, Madamu Rosette Mutoni n'abakozi bakorana, Umuyobozi ushinzwe w'ishami rishinzwe ubuvugizi n'ikurikiranabikorwa muri REMA, Madamu Rachel Tushabe, Uhagarariye Inkeragutabara mu karere ka Nyanza, Maj Frank Mugisha, Umuyobozi wa Police mu murenge wa Muyira Muyira, CIP Aimable UWINEZA, Umuhuzabikorwa wa DASSO mu karere ka Nyanza, ingabo na police, abakozi b'Akarere mu ishami ry'ubuhinzi n'iry'imiyoborere myiza, abaturage bo mu murenge wa Muyira, urubyiruko n'abahagarariye umufatanyabikorwa TUBURA.

Nyuma y'umuganda wo gutera ibiti, habaye ibiganiro byatanzwe n'abayobozi mu nzego zitandukanye bijyanye no gushimira abateguye igikorwa n'abitabiriye umuganda, hatanzwe n'ikiganiro kijyanye no kurwanya ruswa n'akarengane cyatanzwe na Hon. Senateri George Mupenzi afatanyije na  Hon. Euthalie Nyirabega. Hakiriwe kandi ibibazo by'abaturage, bimwe birakemuka, ibindi bihabwa umurongo. Ibiti  byatawe kuri uyu munsi byose hamwe ni 7600, birimo ibivangwa n'imyaka 4000, n'ibiti by'imbuto 3600, abaturage bakaba barasabwe kubifata neza. 

Umuyobozi w'Akarere n'Abasenateri batera ibiti

Abayobozi bakanguriye abaturage ibyiza byo kurengera ibidukikije no kurwanya ruswa n'akarengane