Mu tugari twose tugize Akarere ka Nyanza habaye umuganda wihariye w’urubyiruko w’igihembwe cya mbere 2025–2026. Ku rwego rw’Akarere, igikorwa cyabereye mu Murenge wa Busasamana, Akagari ka Kavumu, cyitabirwa n’Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Bwana Ngabo Brave, Umuyobozi w’Akarere Wungirije ushinzwe imibereho myiza y’abaturage, Madamu Kayitesi Nadine, inzego z’umutekano (Ingabo, Police na DASSO), Umunyamabanga Nshingwabikorwa w’Umurenge wa Busasamana, abakozi b’Akarere mu ishami ry’imiyoborere myiza, Komite y’Inama y’Igihugu y’Urubyiruko ku nzego zose n’urubyiruko rw’abakorerabushake.

Hakozwe ibikorwa bitandukanye bigamije guteza imbere imibereho myiza n’isuku birimo gutera igishahuro inzu, kubumba no gutunda amatafari, kubaka inzu z’abatishoboye, gusibura imirwanyasuri n’inzira z’amazi, kubaka no gusana ubwiherero ndetse no gushyiraho imirima y’igikoni. Ibi bikorwa byaranzwe n’ubwitange n’ubufatanye bwa buri wese, bikaba bifite agaciro k’amafaranga 10.703.500 Frw.

Mu ijambo rye, Madamu Kayitesi Nadine, Umuyobozi w’Akarere Wungirije ushinzwe imibereho myiza y’abaturage, yashimye uruhare rw’urubyiruko n’inzego zose zifatanyije muri uyu muganda, agira ati: “Urubyiruko ni imbaraga z’igihugu zubaka. Ibi bikorwa twakoze uyu munsi si ugusukura gusa cyangwa kubaka inzu, ni ugutanga urugero no kugaragaza ko ubumwe, ubufatanye n’ubwitange ari byo bitanga ibisubizo birambye ku mibereho y’abaturage. Ndashimira buri wese witabiriye, kandi ndasaba urubyiruko gukomeza kugera ku baturage bose, bakabafasha kwigira no kubaka u Rwanda ruzira ibibazo bibangamiye umuturage, rwimakaza isuku no kurengera ibidukikije.”

Nyuma y’umuganda, abitabiriye bagejejweho ikiganiro cyari gifite insanganyamatsiko igira iti “Uruhare rw’urubyiruko mu kurengera ibidukikije.” Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Bwana Ngabo Brave, yibukije urubyiruko amahirwe bafite n’inshingano yo kuyabyaza umusaruro mu buryo burambye, agira ati:

“Uruhare rwanyu mu kubungabunga ibidukikije ni ingenzi cyane. Mufite imbaraga, mufite ubushake, mufite n’ubumenyi bugezweho. Ntimukagire umuganda nk’aho ari umuhango gusa, ahubwo muwukoreshe nk’umwanya wo guhindura imibereho y’abantu no kwigisha abandi gusigasira ibidukikije. Mufite amahirwe menshi yo kubaka igihugu kizira ibyangiza ibidukikije, kandi Minisiteri izakomeza kubashyigikira muri urwo rugendo.”

Uyu munsi w’umuganda wasoje usigiye urubyiruko n’abafatanyabikorwa ishusho y’uko imbaraga z’urubyiruko, igihe zihujiwe n’inzego zose z’igihugu, zishobora guhindura imibereho y’abaturage mu buryo bufatika kandi burambye. Byongeye kugaragaza kandi ko umuganda w’urubyiruko atari igikorwa gisanzwe, ahubwo ari ishingiro ry’iterambere rishingiye ku bushake, ubwitange no kwishakamo ibisubizo.