Ku wa 15 Ukuboza 2025, mu cyumba cy’inama cy’Akarere ka Nyanza habereye amahugurwa yihariye ku Gahunda y’Igihugu yo Kwikura mu Bukene mu buryo burambye. Aya mahugurwa yari agamije gusobanurira abayobozi n’abafatanyabikorwa imikorere, intego n’inshingano za buri rwego mu gushyira mu bikorwa iyi gahunda igamije guhindura imibereho y’abaturage mu buryo burambye.

Amahugurwa yitabiriwe n’Umuyobozi w’Akarere w’Agateganyo, Bwana Kajyambere Patrick, Umuyobozi w’Akarere wungirije ushinzwe imibereho myiza y’abaturage, abagize Komite ya Graduation ku rwego rw’Akarere, Komisiyo y’Imibereho Myiza mu Nama Njyanama, abayobozi ba Komisiyo za JADF, Abanyamabanga Nshingwabikorwa b’imirenge n’abashinzwe imibereho myiza ku rwego rw’imirenge.

Hibanze ku gusobanura uruhare rwa buri rwego mu ishyirwa mu bikorwa rya Graduation, hagamijwe ko abaturage bava mu bukene binyuze mu bufatanye bw’inzego za Leta n’abafatanyabikorwa. Abahuguye—abakozi b’Intara y’Amajyepfo bashinzwe Graduation na Social Protection—bagaragaje uburyo gahunda ihuza inkunga, ubumenyi n’igihe cyo gukurikirana umuryango ku buryo umuturage atava mu bukene by’igihe gito, ahubwo agahindura imibereho ye mu buryo burambye.

Abitabiriye amahugurwa bishimiye ubumenyi bahawe, bagaragaza ko bamenye neza inshingano zabo mu kumenya abagenerwabikorwa, kubahuza n’abafatanyabikorwa, gukurikirana iterambere ryabo no gukemura imbogamizi zihura n’ishyirwa mu bikorwa.

Umuyobozi w’Akarere yasobanuye kokwivana mu bukene atari gahunda y’inkunga gusa, ahubwo ari inzira yo guha abaturage ubushobozi, kububakira ubushobozi n’amahirwe yo kwigira.