Ku cyumweru tariki ya 8 Gicurasi 2022, Mu murenge wa Kibirizi, Akagari ka Cyeru, Umudigudu wa Rutete ahazwi nko ku i Bambiro habereye umuhango wo Kwibuka ku nshuro ya 28 Jenoside yakorewe Abatutsi mu 1994 hibukwa by'umwihariko abagore n'abana bishwe muri Jenoside. Ku i Bambiro hiciwe abagore n'abana basaga 400 bari babwiwe ko baharindirwa nyamara bakaza kwicwa urw'agashinyaguro. Ni umuhango wabimburiwe no kunamira no gushyira indabo ku Rwibutso rwa Jenoside rwa Kibirizi rushyinguwemo imibiri y'abagore n'abana basaga 400 harimo umugabo 1 bahereyeho bica bavuga ko bari kwivura umwaku w'Abatutsikazi.

Umuhango witabiriwe n'abayobozi ndetse n'abashyitsi batandukanye barimo Minisitiri w'Uburinganire n'Iterambere ry'Umuryango  Prof. Bayisenge Jeannette akaba ari na we wari umushyitsi mukuru,
Bamwe mu bagize ihuriro ry'abagore mu Nteko ishinga amateko (FFRP) harimo Perezida wa FFRP Hon. Mbakeshimana Chantal, Visi Perezida wa FFRP, Hon Senateri Murangwa Ndangiza Hadja, Hon. Senateri Uwera Pélagie, Hon. Senateri Kanziza Epiphanie, Hon. Depite Nyirabega Eutalie, Hon. Depite Uwumuremyi M.Claire, Hon. Depite Ahishakiye Mediatrice, Hon. Depite Uwamahoro Berthilde, Hon. Depite Karinijabo Barthélemie, Hon. Depite Uwanyirigira M.Florance. 

Hari kandi Umuyobozi w'Akarere ka Nyanza, Bwana Ntazinda Erasme n'abagize Komite Nyobozi bose, Perezida w'Inama Njyanama y'Akarere ka Nyanza Madame Mukagatare Judith, Umuyobozi w'ishami rishinzwe kwibuka no kurwanya Jenoside muri MINUBUMWE Dr Muhayisa Josée;
Uhagarariye IBUKA akaba n'umuyobozi wa AVEGA AGAHOZO Madame Mukabayire Valerie; Umuyobozi mukuru wungurije muri NCDA Bwana Gilbert Munyemana, Uhagarariye abacitse ku icumu bafite ababo bashyingiwe mu Rwibutso rwa Kibirizi Bwana Uwayezu Jean Fidele, Umuyozi wa RF mu Karere Lt. Col. E. Rukundo, Umuyobozi w'Ingabo mu Karere Capt. Tharcisse Ruhana,
Umuyobozi wa Police mu karere ka Nyanza, SP Nkurunziza Evode,
Umuyobozi wa RIB ku rwego rw'intara Madame Kamarampaka Consolée, Uhagarariye NISS mu Karere, Uhagarariye, Umuhuzabikorwa wa CNF ku rwego rw'Igihugu n'abandi. 

Mu ijambo ry'ikaze, Umuyobozi w'Akarere Bwana Ntazinda Erasme yihanganishije imiryango yabuze ababo muri Jenoside by'umwihariko ababyeyi n'ibibondo biciwe ku i Bambiro mu buryo bwa kinyamaswa. Yashimiye abaje kubafata mu mugongo bose, ashimira byimazeyo ingabo zari iza FPR-Inkotanyi zahagaritse Jenoside, ku isonga Nyakubahwa Perezida wa Repubulika.

Umuyobozi w'Ishami rishinzwe kwibuka no kurwanya Jenoside muri Minisiteri y'Ubumwe bw'Abanyarwanda n'inshingano mbonera, Dr Muhayisa mu ijambo rye yavuze ko abakoze Jenoside bari bafite umugambi wo kurimbura uwitwa umututsi wese cyane abishe abagore n'abana.Yashimiye abarokotse Jenoside bakomeje gutwaza kuko ariko kwiyubaka nyako

Mu buhamya bwa Niwemutoni Josée warokokeye ku i Bambiro ariko Umubyeyi we akaba ari we wishwe bwa mbere ku musozi wa Kibirizi yavuze inzira y'umusaraba yanyuzemo muri Jenoside ashimira Uwitwa Alexis wamuhishe ndetse n'inkotanyi zamurokoye ubu akaba ariho kandi akomeje kwiyubaka.

Bwana Uwayezu Jean Fidele uhagarariye imiryango y'abarokotse Jenoside yakorewe Abatutsi bafite ababo bashyinguwe mu Rwibutso rwa Kibirizi avuga ko bifuza ko aba babyeyi n'abana bakubakirwa urwibutso rubahesha icyubahiro, agasaba buri wese kubishyiramo imbaraga n'umitima, agatanga ibitekerezo ku buryo ababyeyi bakubakirwa urwibutso rutuma abaza kwibuka bose bazajya bunamira ababo nta nkomyi kuko imyaka ibaye 28 bashyinguye muri shitingi kure y'aho kwibuka bibera kandi hafi cyane y'umuhanda. Yasabye inzego zose harimo ibigo bya Leta, Intumwa za rubanda, CNF na Minisiteri ibifite mu nshingano ko ubuvugizi bwose n'igishoboka cyose byakorwa kugira ngo urwibutso ruboneke. Yasoje ashimira Leta y'ubumwe uko yita ku barokotse jenoside bakaba bakomeje kwiyubaka muri byose asaba abitabiriye kwirinda kugereka ibintu byose kuri Leta ahubwo nabo bakagaragaza uruhare rwabo.

Mu ijambo ry'Umushyitsi mukuru Nyakubahwa Minisitiri w'uburinganire n'iterambere ry'umuryango Prof. Bayisenge Jeannette yavuze ko kwibuka abagore n’abana bishwe muri Jenoside yakorewe Abatutsi mu 1994 bituma dutekereza ku bugome ndengakamere Jenoside yakoranywe. Yagize ati: "kwica abagore n'abana byari bigamije kurimbura ubuzima bw’abatutsi uhereye ku bagore babyara bakarera n'abana babo hagamijwe kuzimya ejo hazaza". Yavuze kandi ko kubibuka ari ugutanga ubutumwa ku bakiri bato kuko bagomba bagasobanurirwa neza amateka yaranze igihugu cyacu, bagatozwa kubaha ikiremwamuntu nta vangura iryo ari ryo ryose, bikabafasha gushyira imbere indangagaciro na kirazira, bakarangwa n’umuco wo gukunda Igihugu.Yizeje abari aho ko ubuvugizi buzakomeza gukorwa kugira ngo harebwe uko ictifuzo cy'urwibutso cyashyirwa mu bikorwa.

Umwana uhagarariye abandi yunamira abana bishwe muri Jenoside

Hafashwe umunota wo kwibuka abagore n'abana bishwe muri jenoside

Minisitiri Prof. Bayisenge Jeannette ashyira indabo ku Rwibutso rwa Jenoside rwa Kibirizi

Abadepite n'abasenateri bagize FFRP bifatanyije n'Akarere kwibuka abagore n'abana

Niwemutoni Josee yatanze ubumya bw'inzira y'umusaraba yanyuzemo muri Jenoside kugeza arokowe n'Inkotanyi

Umuyobozi w'Akarere ka Nyanza Ntazinda Erasme  yashimye abaje kubafata mu mugongo

Inzego zitandukanye zari zitabiriye uyu muhango

Uwayezu Jean Fidele yasabye imbaraga za buri wese kugira ngo hubakwe Urwibutso rwiza rw'abagore n'abana bishwe muri Jenoside

Abagore n'abana basaga 400 bari bizejwe uburinzi ariko bicwa urw'agashinyaguro

Inzego zitandukanye zunamira abagore n'abana bishwe muri jenoside yakoreweAbatutsi