Abasenateri bo muri Komisiyo ya Politike n’Imiyoborere muri Sena y’u Rwanda, Senateri Bideri John Bonds na Senateri Mukakarangwa Clotilde, basuye Umurenge wa Kibirizi mu Karere ka Nyanza baganiriza abaturage n’inzego zitandukanye ku kamaro ko kubahiriza ihame ry’uburinganire n’ubwuzuzanye mu muryango Nyarwanda.

Mu ruzinduko rwabo, Abasenateri basuye ibikorwa bitandukanye bigamije guteza imbere imibereho myiza y’abaturage, banaganiriza ibyiciro bitandukanye by’abaturage ku nyungu ziri mu kubaka imiryango ibanye neza no kugera ku iterambere rirambye. Banagaragaje ingaruka zituruka ku miryango ibanye nabi, basaba ubufatanye mu gukumira amakimbirane no kubaka umuco w’ubwuzuzanye.

Senateri Bideri John Bonds yashimangiye ko ihame ry’uburinganire rifitiye akamaro gakomeye umuryango Nyarwanda n’iterambere ry’igihugu. Ati:“Kubahiriza ihame ry’uburinganire ni inzira y’iterambere rirambye. Iyo abagore n’abagabo bafatanya mu gushaka ibisubizo by’ibibazo by’imiryango, igihugu cyose cyunguka. Tugomba gukomeza gushyira imbaraga mu kubaka umuco w’ubwuzuzanye mu ngo zacu no gufasha urubyiruko gukura rufite indangagaciro z’icyubahiro n’ubufatanye.”

Madame Kayitesi Nadine, Umuyobozi w’Akarere wungirije ushinzwe imibereho myiza y’abaturage, yashimangiye ko Akarere ka Nyanza gafite gahunda zihamye zo gushyigikira ihame ry’uburinganire mu nzego zose: Yagize ati: “Nk’Akarere, twiyemeje gufatanya n’inzego zitandukanye gushyira mu bikorwa politiki y’uburinganire. Ibi bidufasha kugabanya amakimbirane mu miryango, kurinda abana no guteza imbere imibereho myiza y’abaturage bacu.”

Nyuma y’ibiganiro, Abasenateri basuye imiryango ibiri – imwe ibanye mu makimbirane n’indi ibanye neza – kugira ngo barebere hamwe uko hakemurwa ibibazo by’imibanire. Hakurikiyeho inteko rusange y’abaturage aho baganirijwe ku bukangurambaga bwo kohereza abana mu ishuri, kugira umuco w’isuku mu ngo no gukumira indwara zituruka ku mwanda. Umunsi wasojwe n’ijambo ryo kwakira ibitekerezo n’ibibazo by’abaturage byose byahawe ibisubizo.