Kimwe n’ahandi mu gihugu, tariki ya 8 Werurwe 2025, mu Karere ka Nyanza hizihijwe Umunsi Mpuzamahanga w'Umugore. Ku rwego rw'Akarere wizihirijwe mu murenge wa Muyira aho umushyitsi mukuru yari Hon. Senateri Ngarambe Telesphore, wari kumwe na Hon. Depite Bakundufite Christine na Hon. Depite Mbabazi Olivia, ndetse n’Umuyobozi w'Akarere ka Nyanza, Bwana Ntazinda Erasme.

Ibi birori byitabiriwe kandi n’abahagarariye inzego z'umutekano mu Karere, abahagarariye inzego z’abagore ku rwego rw’Akarere n’Umurenge, ndetse n’abafatanyabikorwa, barimo Action Aid. Insanganyamatsiko y’uyu munsi yari “Umugore ni uw’Agaciro”, igaruka ku bushobozi bw’umugore mu muryango no mu iterambere rirambye ry’igihugu.

Mu butumwa bwatanzwe n’abayobozi batandukanye, bagarutse ku ruhare rw’umugore mu kubaka iterambere rirambye, bashishikariza abagore gukomeza kwigirira icyizere, kwihesha agaciro no kugahesha igihugu cyabo. Hanagarutswe ku kamaro ko kwita ku burere bw’abana nk’ishingiro ry’ahazaza heza h’igihugu.

Mu rwego rwo gufasha imiryango kwiteza imbere, imiryango isaga 400 yahawe ubufasha butandukanye aho miryango 200 yahawe amashyiga arondereza ibicanwa ku bufatanye na Action Aid, Imiryango 24 yorozwa inka muri gahanda ya girinka munyarwanda, imiryango 23 yorojwe ihene naho abajyanama n’abafashamyumvire mu buhinzi bahabwa ibikoresho bibafasha kunoza inshingano zabo.

Hon. Senateri Ngarambe Telesphore, mu ijambo rye, yashimangiye ko umugore ari inkingi y’iterambere n’ihame ry’uburinganire rigomba gushyirwa imbere. Yagize ati:

“Kongera ubushobozi bw’umugore ni ukwagura iterambere ry’igihugu. Dufite inshingano zo kumufasha gukomeza kwigirira icyizere, kugira uruhare mu bukungu no gufata imyanzuro igira akamaro ku muryango nyarwanda.”

Ibirori byasojwe n’igikorwa cyihariye aho abana bahawe amata, nk'ikimenyetso cy’urukundo n’ubutumwa bwo kubitaho nk’abazubaka ejo hazaza. Ibi birori byagenze neza, bigaragaza ubusabane, ubumwe, n’ubushake bwo gukomeza guteza imbere umugore no kumuha agaciro kamukwiye mu muryango no mu iterambere ry’igihugu.