Tariki ya 07 Gicurasi 2023, mu murenge wa Kibirizi habereye umuhango wo kwibuka ku nshuro ya 29 Jenoside yakorewe Abatutsi mu 1994 by’umwihariko abagore n'abana biciwe ahazwi nko ku Ibambiro.  Ni igikorwa cyabimburiwe no kunamira no gushyira indabo ku mva ishyinguyemo imibiri isaga 437 y'abagore n'abana bishwe urw’agashinyaguro muri Jenoside yakorewe Abatutsi mu1994 mu murenge wa Kibirizi.

Ni gahunda yitabiriwe na Guverineri w'Intara y'Amajyepfo, Madame Kayitesi Alice akaba ari nawe wari umushyitsi mukuru, Abasenateri n'Abadepite mu Nteko Ishinga Amategeko y’u Rwanda, Umuyobozi w’Ihuriro ry’abagore bo mu Nteko Ishinga Amategeko (FFRP), Umuyobozi w'Akarere ka Nyanza Bwana Ntazinda Erasme, Perezidante wa AVEGA ku rwego rw'igihugu, Madame Kayitesi Immaculée, Umuhuzabikorwa w'Inama y'Igihugu y'Abagore ku rwego rw'Igihugu, abagize inama y'umutekano itaguye y'Akarere, abanda bayobozi batandukanye ndetse n’abaturage benshi.

Mu byaranze iyi gahunda harimo kunamira abishwe hashyirwa indabo ku mva ishyinguyemo abagore n'abana bishwe muri Jenoside yakorewe Abatutsi, ubuhamya, indirimbo zo kwibuka n'ubutumwa bw'abayobozi batandukanye. Abafashe ijambo bose batanze ubutumwa bwo kwihanganisha abarokotse Jenoside yakorewe Abatutsi cyane cyane ababuriye ababo ku Ibambiro, kubakomeza no gushimira ingabo zari iza FPR Inkotanyi n'Umugaba mukuru wazo Nyakubahwa Paul Kagame, Perezida wa Repubulika bahagaritse Jenoside.

Mu ijambo rye umushyitsi mukuru, Guverineri Kayitesi Alice yihanganishije abarokotse Jenoside yakorewe Abatutsi cyane cyane ababuriye ababo ku ibambiro, yashimiye abitabiriye iki gikorwa yihanganisha Abarokotse Jenoside yakorewe Abatutsi abashimira ubutwari bubaranga ndetse n’uburyo bihangana ntibaheranwe n’agahinda ahubwo bagatanga imbabazi bagamije kubaka u Rwanda abasaba gukomeza kwiyubaka.

Yagize ati: “Kwibuka Abagore n’Abana bishwe muri Jenoside yakorewe abatutsi ni ugutanga ubutumwa ku bakiri bato kugira ngo basobanukirwe neza ubugome ndengakamere Jenoside yakorewe Abatutsi yakoranywe, no kubatoza kubaha ikiremwamuntu nta vangura iryo ari ryo ryose.”

Abadepite bo mu ihuriro ry'abagore bo mu Nteko Ishinga Amategeko (FFRP) bari baje kwibuka abana n'abagore

Abarimo abanyamuryango ba AVEGA-Agahozo nabo bari baje kwibuka abagore n'abana biciwe ku Ibambiro

Umuyobozi w'Akarere yunamira abagore n'abana bishwe muri Jenoside yakorewe Abatutsi mu 1994

Perezidante wa AVEGA-Agahozo yunamira abagore n'abana biciwe ku Ibambiro muri Jenoside yakorewe Abatutsi

Abagore n'abana batanga ubuhamya bavuga inzira y'umusaraba banyuzemo muri Jenoside ku Ibambiro

Guverineri Kayitesi Alice ageza ijambo ku baje kwibuka abagore n'abana biciwe ku Ibambiro muri Jenoside

Abantu b'ingeri zinyuranye bari baje kwibuka abagore n'abana bishwe muri Jenoside yakorewe Abatutsi