Ku ishuri ribanza rya Mushirarungu, riherereye mu Murenge wa Rwabicuma, habereye igikorwa cyashimishije umuryango mugari w’ishuri aho Ishuri Rikuru ryigisha amategeko (ILPD) ryabashyikirije ibikoresho bigamije kongera ireme ry’uburezi. Iki gikorwa ni igikorwa cyerekana uruhare rwa ILPD mu gushyigikira abana n’amashuri yo mu bice by’icyaro.

Buri mwana wo mu mwaka wa gatandatu yahawe ibitabo bitanu by’amasomo y’ingenzi, ibikoresho byifashishwa mu myigishirize, ndetse n’igitabo cyihariye cy’umwarimu. Ibi bikoresho bigamije gufasha abanyeshuri kwiga neza, kongera ubushobozi bw’abarimu no guteza imbere ireme ry’imyigire n’imyigishirize.

Umuyobozi w’ishami ry’uburezi mu Karere ka Nyanza, wari umushyitsi mukuru, yashimye ILPD ku bufatanye n’ubwitange bigaragaza ko guteza imbere uburezi kuko bisaba uruhare rwa buri wese. Yasabye abarimu gukoresha neza ibi bikoresho, bakigisha bafite umuhate n’umurava, kuko ubu bafite ibifasha kugera ku ntego zo gutegura neza abanyeshuri.

ILPD nayo yemeje ko izakomeza gukorana n’Akarere ka Nyanza mu guteza imbere uburezi bufite ireme, by’umwihariko mu gufasha amashuri yo mu bice bitari Umujyi.