Mu rwego rwo kunoza imitangire ya serivisi z’irangamimerere no guteza imbere ikoreshwa ry’ikoranabuhanga mu kubika no gukusanya imibare y’ingenzi ku baturage, mu cyumba cy’inama cy’Akarere ka Nyanza habereye amahugurwa yihariye y’Abanyamabanga Nshingwabikorwa b’Imirenge n’Utugari.

Aya mahugurwa yateguwe na Minisiteri y’Ubutegetsi bw’Igihugu (MINALOC) ku bufatanye n’Ikigo cy’Igihugu Gishinzwe Irangamuntu (NIDA) na RBC, hagamijwe kongerera ubumenyi n’ubushobozi abayobozi b’inzego z’ibanze mu bijyanye no gutanga serivisi z’irangamimerere, cyane cyane hifashishijwe sisitemu ya CRVS (Civil Registration and Vital Statistics).

Mu gutangiza ku mugaragaro aya mahugurwa, Umuyobozi w’Akarere w’Agateganyo, Bwana Kajyambere Patrick, yashimangiye ko irangamimerere ari urufunguzo mu miyoborere myiza no mu igenamigambi rishingiye ku mibare ifatika.

Yagize ati: “Irangamimerere ni inkingi ikomeye mu igenamigambi ry’igihugu. Iyo abaturage banditswe neza kandi ku gihe, bigira uruhare rukomeye mu kubagezaho serivisi zibegereye kandi zinoze, binadufasha gufata ibyemezo bishingiye ku mibare yizewe,” — Bwana Kajyambere Patrick, Umuyobozi w’Akarere w’Agateganyo

Yibukije ko abanyamabanga nshingwabikorwa ko ari igisubizo ku itangwa ry’izi serivisi ku rwego rw’akarere n’imirenge, bityo bakaba bagomba gukoresha neza ubumenyi bahawe kugira ngo abaturage bagire imibereho myiza ishingiye ku burenganzira bwabo.

Abitabiriye amahugurwa bahawe ubumenyi ku bijyanye no kwandikisha abavutse n’abapfuye ku gihe, gutanga ibyangombwa by’irangamimerere bifite agaciro, kwandika ishyingirwa, no kunoza imikoranire n’inzego zindi mu itangwa rya serivisi.

Amahugurwa yaranzwe n’ubufatanye, ibitekerezo byubaka n’ubushake bwo kunoza ibyo basanzwe bakora, kugira ngo serivisi z’irangamimerere zirusheho kuba inkingi y’iterambere rirambye.

Abayitabiriye biyemeje gushyira mu bikorwa ibyo bungukiye, no gukomeza guharanira ko buri muturage yandikwa kandi agahabwa serivisi zishingiye ku itegeko n’ikoranabuhanga, bityo Nyanza igakomeza kuba ku isonga mu miyoborere ishingiye ku muturage.