Taraiki ya 22 Ugushyingo 2025, Mu Murenge wa Muyira, mu Tugari twa Nyundo na Nyamiyaga, habaye umuganda udasanzwe wo gutera ibiti bigamije kurimbisha no kurengera umuhanda wa kaburimbo, no kuzamura isura y’Akarere ku kurengera ibidukikije. Iki gikorwa cyitabiriwe n’abaturage basaga 2000, inzego z’umutekano, abayobozi ku rwego rw’Akarere n’Intara ndetse n’abafatanyabikorwa batandukanye. Muri uyu muganda hatewe ibiti ibihumbi 11 ku burebure bwa kilometero 8 z’umuhanda wa Kaburimbo, ku buso bungana na hegitari 16. Ni ibikorwa bifite agaciro ka miliyoni 11 z’amafaranga y’u Rwanda.

Umushyitsi Mukuru, CG E. Murenzi, Umuyobozi wa RCS, yari kumwe n’abandi bayobozi barimo baturutse muri Miniseteri y’Umutekano, NSHIMIYIMANA Vedaste, Umunyamabanga Nshingwabikorwa w’Intara y’Amajyepfo, Umuyobozi wa Polisi mu Ntara y’Amajyepfo, abahagaragriye ingabo n’abandi. Bose bashimye ubwitabire n’ubufatanye bwagaragaye, bavuga ko ari urugero rwiza rwo kwishyira hamwe mu bikorwa bigamije kurengera ibidukikije.

Mu butumwa bwatanzwe, abaturage bashishikarijwe gukomeza gufata neza ibiti byatewe kugira ngo bigere ku musaruro witezwe, harimo gutuma ahantu h’ ubukerarugendo haba heza kandi habereye gutembererwa. Hanibukijwe ko iterambere rirambye risaba uruhare rwa buri wese, cyane cyane mu gukumira isuri no guteza imbere ubwiza bw’imihanda.

Mu ijambo rye, Umushyitsi Mukuru CG E. Murenzi yashimiye abaturage uruhare rwabo, abasaba gukomeza umuco wo kwita ku biti byatewe no gukomeza ibikorwa byo kurengera ibidukikije. Yagize ati: “Iki gikorwa kigaragaza ubumwe n’ubwitange by’Abanyarwanda. Mukomeze kwita kuri ibi biti kugira ngo bizafashe mu kugira Nyanza itekanye kandi iteye imbere.” Yasoje yifuriza abaturage Noheri Nziza n’umwaka mushya muhire wa 2026.