Mu kigo cya HVP Gatagara habereye umwiherero w’iminsi ibiri ugamije guteza imbere imicungire myiza y’umutungo n’abakozi no kunoza serivisi z’ubuvuzi mu Karere ka Nyanza. Ni umwiherero witabiriwe n’abafatanyabikorwa mu buzima, ibigo nderabuzima, ibitaro ndetse na Komisiyo y’Imibereho Myiza muri Njyanama y’Akarere, hagamijwe kungurana ubumenyi no guhuza ibikorwa bigamije iterambere ry’ubuzima muri rusange.

Afungura ku mugaragaro uyu mwiherero, Umuyobozi w’Akarere ka Nyanza w’agateganyo, Bwana Kajyambere Patrick, yashimye abitabiriye iki gikorwa by’umwihariko abaterankunga n’abafatanyabikorwa bashyigikira iterambere ry’ubuzima mu Karere. Yagize ati: “Dushima cyane umusanzu w’ibigo byacu birimo Igihozo Medical Polyclinic, byatanze urugero mu kuzamura ibipimo by’ubuzima, ndetse n’Ikigo nderabuzima cya Kirambi cyahize ibindi bigo mu byiciro bitandukanye byo kuzamura ibipimo. Uyu mwiherero ni umwanya wo gusuzuma aho tugeze, kwiga ku ngamba nshya no kurushaho guhuza ibikorwa mu nyungu z’umuturage.”

Umwiherero wagaragayemo ibikorwa bitandukanye birimo gusinyana imihigo n’ibyiciro bitandukanye by’abayobora ibigo n’abatanga serivisi z’ubuzima, kugira ngo hazamurwe urwego rw’imikorere n’ubufatanye hagati y’inzego zose z’ubuzima.

Mu gusoza uyu mwiherero, Umuyobozi w’Akarere Wungirije ushinzwe Imibereho Myiza y’Abaturage, Madamu Kayitesi Nadine, yasabye abitabiriye kongera umurava mu byo bakora no gushyira imbere umuturage. Yagize ati: “Twese tugomba kuzirikana intego y’uyu mwiherero ishingiye ku nsanganyamatsiko igira iti ‘Serivisi inoze, ishingiro ry’ubuzima bwiza’. Ibi ntibizagerwaho tudashyize hamwe ngo buri rwego rurebe uruhare rwarwo mu kubaka ubuzima bwiza bw’abaturage.”

Uretse ibiganiro byubaka, abakozi bo mu ishami ry’ubuzima bashyikirijwe ishimwe rishingiye ku ruhare n’umwete bagaragaje mu kuzamura ibipimo by’ubuzima. Hanafashwe imyanzuro izakomeza gufasha ibigo by’ubuvuzi guhindura imikorere n’imyumvire mu nyungu z’umuturage. Umwiherero wasojwe na siporo y’umupira w’amaguru yahuje HVP Gatagara n’Ibitaro bya Nyanza, maze Gatagara itsinda Nyanza ibitego 3-2 mu mikino yari igamije kwerekana ubumwe n’ubufatanye.