Mu cyumba cy’inama cy’Akarere ka Nyanza habereye inama y’umutekano yaguye iyobowe n’Umuyobozi w’Akarere w’Agateganyo, Bwana Kajyambere Patrick, ari kumwe n’abagize Komite y’Umutekano itaguye. Yanitabiriwe n’Abashinjacyaha b’uturere twa Muhanga na Huye hamwe n’Abanyamabanga Nshingwabikorwa b’imirenge.

Iyi nama yasuzumye imyanzuro y’inama iheruka, inareba uko umutekano wifashe mu kwezi kwa Nyakanga 2025, hanaganirwa kandi ku mirimo ifitiye rubanda inyungu rusange.

Abitabiriye inama biyemeje gushyira imbaraga mu kurwanya ibiyobyabwenge, gushishikariza abaturage kwitabira icyumweru cy’irangamimerere, gukaza irondo no kugenzura abarisiba, guhagarika ubucukuzi butemewe bw’amabuye y’agaciro no gusiba ibyobo byacukuwe mu buryo butemewe, kugenzura amasaha y’utubyiniro n’utubari no gukurikirana umutekano wo ku byambu.

Umuyobozi w’Akarere w’Agateganyo, Bwana Kajyambere Patrick, yashimangiye ko umutekano ari wo musingi w’iterambere ry’igihugu. Yagize ati: “Tugomba gukomeza gufatanya, duharanira kurinda umutekano wacu no gushyira imbere imirimo ifitiye rubanda inyungu rusange, kuko ari byo bizatuma tugera ku iterambere rirambye twifuza.”