Inama Mpuzabikorwa y’Akarere ka Nyanza yateranye tariki 22 Ukuboza 2025 iyobowe na Guverineri w’Intara y’Amajyepfo, Madamu Kayitesi Alice, yitabiriwe n’inzego zinyuranye kuva ku Mudugudu kugeza ku Karere, hamwe n’abafatanyabikorwa, ku nsanganyamatsiko igira iti: “Imiyoborere Myiza, Umuturage ku Isonga.”

Mu ijambo ry’ikaze, Umuyobozi w’Akarere w’Agateganyo, Bwana Patrick Kajyambere, yagaragaje ko Akarere kateye  intambwe mu kunoza serivisi, aho igipimo cy’abishimira serivisi cyazamutse kiva kuri 72% kigera kuri 80%, mu gihe igwingira ryagabanutse riva kuri 32% rigera kuri 23%.

Atangiza inama, Guverineri Kayitesi Alice yibanze ku isuku muri rusange aho yagize ati:
“Isuku ni inshingano za buri wese, naho imirire mibi n’igwingira bigomba gucika burundu. Kunoza serivisi ni inshingano z’abayobozi kandi ni uburenganzira bw’abaturage.”
Yasabye abayobozi gushyira umuturage ku isonga, bagashyira mu bikorwa ibyemezo bifatika bigamije iterambere n’imibereho myiza.

Umuyobozi w’Akarere wungirije Ushinzwe Imibereho Myiza, Madamu Nadine Kayitesi, yayoboye ikiganiro ku kubaka Akarere gatekanye, kimakaza isuku n’isukura no guharanira iterambere rirambye. Hanatanzwe ibiganiro ku kurengera abatishoboye, kwivana mu bukene no kubungabunga umutekano.

Muri iyi nama hashimiwe abagaragaje umwihariko mu mihigo ya 2024–2025: Akagari ka Kavumu (Busasamana) kahize utundi, Umurenge wa Busasamana uba uwa mbere, Ikigo Nderabuzima cya Kirambi gishimirwa serivisi z’ubuzima, mu gihe amashuri  nka Lycée de Nyanza, Christ Roi, Nyanza TSS na GS Ruyenzi yashimiwe mu burezi.