Tariki 25 Ugushyingo 2025, Itsinda ry’Abadepite riyobowe na Hon. Uwamariya Odette, ari kumwe na Hon. Bizimana Minani Deogratias, Hon. Dr. Umutesi Liliane, ndetse n’umukozi w’Inteko Ishinga Amategeko bakomereje gahunda y’ingendo zabo mu murenge wa Muyira ahatanatangirijwe ubukangurambaga bw’iminsi 16 bugamije kurwanya ihohotera rishingiye ku gitsina.

Bakiriwe na Madamu Kayitesi Nadine, Umuyobozi w’Akarere wungirije ushinzwe imibereho myiza y’abaturage, wabifurije ikaze abagaragariza ko “Akarere ka Nyanza gakomeje gukora uko gashoboye ngo imibereho y’abaturage irusheho gutera imbere kandi dufatanyije n’inzego zitandukanye twiteguye kwakira ibitekerezo n’ibibazo byose byabarengera.”

Nyuma y’ikiganiro n’abakozi b’Umurenge n’abafatanyabikorwa, Abadepite basuye ibikorwa remezo bitandukanye birimo umuhanda wa kaburimbo, amashanyarazi, amateme, site z’imiturire, ikusanyirizo ry’amata rya Migina n’ibikorwa byo kurengera ibidukikije byigishirizwa kuri EAV Mayaga. Ibi bikorwa byose bigaragaza iterambere rimaze kugerwaho n’Umurenge wa Muyira mu guteza imbere imibereho y’abaturage n’iterambere rusange.

Gahunda y’uru ruzinduko yasorejwe mu nteko y’abaturage, aho hanatangijwe ku mugaragaro ubukangurambaga bw’iminsi 16 bugamije kurwanya ihohotera rishingiye ku gitsina. Muri iyi nteko, hatanzwe ibiganiro birimo inshingano z’Inteko Ishinga Amategeko, imikoreshereze y’ubutaka, uburenganzira bw’umwana n’umugore ndetse n’icuruzwa ry’abantu. Harimo kandi icyinamico n’ubuhamya bw’umuryango wari waranyuze mu makimbirane.

Mu ijambo rye, Hon. Uwamariya Odette yashimangiye ko “kurwanya ihohotera rishingiye ku gitsina ari inshingano za buri wese, kandi tugomba gushyira imbere umutekano n’amahoro mu muryango kugira ngo tugire igihugu cyubakiye ku buringanire n’ubwuzuzanye.”