Mu Murenge wa Rwabicuma, hatangirijwe ku mugaragaro icyumweru cyahariwe Irangamimerere, igikorwa cyitabiriwe n’abaturage benshi ndetse n’abayobozi batandukanye ku rwego rw’Akarere n’umurenge. Umushyitsi mukuru yari Umuyobozi w’Akarere w’Agateganyo, Bwana Kajyambere Patrick, wari kumwe n’abashinzwe irangamimerere n’abayobozi b’inzego z’ibanze.

Icyumweru cyahariwe Irangamimerere cyatangijwe hagamijwe gukangurira abaturage kumenya akamaro ko kwandikisha abana bavuka ku gihe, kwandukuza abapfuye, gusaba impamyabushyingiranwe ku bashyingiranywe byemewe n’amategeko, no kumenya uburyo bwo gucunga umutungo bushingiye ku masezerano y’abashakanye. Hanasobanuwe kandi uburyo bushya bwo gutanga no gusaba serivisi zijyanye n’irangamimerere hakoreshejwe ikoranabuhanga, hagamijwe kongera umuvuduko no koroshya serivisi.

Bwana Kajyambere Patrick yagize ati: “Irangamimerere ni umusingi w’iterambere ry’umuryango n’igihugu. Iyo umwana yanditswe ku gihe, bimufungurira inzira z’amahirwe menshi mu buzima. Nta muturage ukwiye gukerensa akamaro ko kwandikisha abavuka, kwandukuza abapfuye cyangwa gusezerana imbere y’amategeko.”

By’umwihariko, muri iki cyumweru hazibandwa ku kwandikisha abana batinze kwandikishwa no kugeza serivisi z’Irangamimerere ku baturage ku rwego rw’utugari, kugira ngo zibegere kurushaho. Abaturage bahawe umwanya wo kubaza ibibazo ku ngingo zitandukanye, ibisubizo bikaba byaratanzwe mu buryo bunoze, ndetse hafatwa n’ingamba zo gukemura ibitarakemuka.

Iki gikorwa cyasize kinyuze abaturage, bagaragaza ko gusobanurirwa neza serivisi z’Irangamimerere bizabafasha kuzikoresha ku gihe no mu buryo bwemewe n’amategeko, bityo bigafasha mu kubaka igihugu gitekanye kandi giteye imbere.