Ku bufatanye na Minisiteri ya Siporo, Umuyobozi w’Akarere ka Nyanza w’Agateganyo, Bwana Kajyambere Patrick, yasoje ku mugaragaro umwiherero w’iminsi irindwi wabereye muri College Igihozo St Peter, wari ugamije guteza imbere impano z’abana bato mu mikino itandukanye. Uyu mwiherero wahurije hamwe abana baturutse mu mirenge yose y’Akarere, bahabwa amahirwe yo kunguka ubumenyi bwimbitse mu mikino no kwimakaza indangagaciro z’umuco Nyarwanda.

Abitabiriye umwiherero bahuguwe n’abatoza babizobereyemo, babigisha tekiniki z’imikino itandukanye, imyitozo ngororamubiri, imbaraga zo gukorera mu ikipe, kubaha, kwitwara neza n’indangagaciro z’ubumwe n’ubunyangamugayo. Byabaye umwanya wo kubaka impano, ariko kandi no kurera urubyiruko rufite icyerekezo n’indangagaciro.

Mu ijambo rye, Umuyobozi w’Akarere yashimiye abarimu n’abatoza ku ruhare bagize mu gutoza no kurera aba bana, anashimira by’umwihariko ababyeyi bakomeje gushyigikira impano z’abana babo mu myidagaduro ifite intego. Yagize ati: “Impano zanyu ni ishingiro ry’ejo hazaza. Mukomeze kuzibyaza umusaruro, mukore siporo mutekanye kandi mwitware neza mu buzima busanzwe.”

Mu gusoza, hahembwe abakinnyi babiri ba mbere muri buri mukino, mu byiciro by’abahungu n’abakobwa, mu rwego rwo kubashimira no kubatera imbaraga zo gukomeza kwitwara neza.