Tariki ya 16 Ukuboza 2022, mu Murenge wa Mukingo, Akagari ka Kiruli habereye ibirori byo gusoza ku mugaragaro ukwezi kwahariwe ibikorwa bya Police mu Karere ka Nyanza hatahwa ibikorwa by'iterambere n'imibereho myiza byahawe abaturage. Mu bikorwa byakozwe muri uku kwezi harimo urugo mbonezamikurire (ECD) rwubatswe i Kiruli, inzu zubakiwe imiryango ibiri mu murenge wa Mukingo na Kigoma ndetse n'amashanyarazi akomoka ku mirasire y'izuba yahawe ingo 284.

Abashyitsi bitabiriye iki ni Umuyobozi w'Akarere wungirije ushinzwe imibereho myiza y'abaturage Madamu Kayitesi Nadine wari n'umushyitsi mukuru, Umuyobozi wa Police mu Karere ka Nyanza SSP E.Kizza, Uhagarariye Ingabo Cpt. E. Dukuzimana, Ushinzwe abinjira n'abasohoka mu Karere, Umuyobozi wa RIB mu Karere, Uhagarariye NISS mu Karere, Umuhuzabikorwa wa DASSO mu Karere, Umunyamabanga Nshingwabukorwa w'Umurenge, abakozi b'Umurenge n'abaturage b'Umurenge wa Mukingo baturiye ahari ibi bikorwa

Ibirori byabimburiwe no gutaha inzu yubakiwe Gatesi Chantal utuye mu Kagari ka Kiruli bikurikirwa no gutaha ECD ya Kiruli ndetse no guha abana amata. Gatesi Chantal wahahwe inzu yashimiye cyane Nyakubahwa Perezida wa Repubulika ko amuvanye mu busembere akamutuza aheza byatumye anamuririmbira. Yagize ati: "Iyi nzu nzayifaya neza  kandi ntabwo nzakoza isoni abayobozi banjye na Police y'u Rwanda ."

Mukashyaka Annonciata wavuze mu izina ry'ababyeyi barera muri ECD Kiruli yashimiye cyane  Police y'Igihugu kuba ibafashije mu burezi n'uburere bw'abana bakabaha urugo mbonezamikurire rwiza rujyanye n'igihe. Ati:"Twari tuzi ko Police ishinzwe umutekano gusa none badufashije no mu iterambere n'uburezi bw'abana bacu. Turabashimira cyane  kandi twiteguye gukomeza gusigasira ibyagezweho"

Umuyobozi wa Police mu Karere ka Nyanza SSP E. Kizza yasabye abahawe ibikorwa bose kubifata neza kandi bagakomeza gufatanya na Police gucunga umutekano buri wese akaba ijisho rya mugenzi we ndetse bagatangira amakuru ku gihe kugira ngo bakumire icyaha kitaraba.

Umuyobozi w'Akarere wungirije ushinzwe imibereho myiza Madame Kayitesi Nadine mu ijambo rye, yashimiye cyane Police ko muri uku kwezi hakozwe ibikorwa byinshi birimo iby'ubukangurambaga n'iby'iterambere n'imibereho myiza nk'urugo mbonezamikurire rwa Kiruli, inzu 2 ndetse n'amashanyarazi y'imirasire 284 aho yavuze ko bisha Akarere cyane mu kwesa imihigo itandukanye ihari nk'uwo guha ingo zose amashanyarazi bitarenze 2024. Yasobanuriye ababyeyi ko ECD ifite akamaro kanini harimo kubagabanyiriza imvune ngo babone uko bateza imbere imiryango naho ku bana ikabafasha gukura mu bwenge imbamutima n'igihagararo bakazavamo abana babereye u Rwanda. Yabasabye gufata neza ibikorwa byose bahawe. 

Gahunda yasojwe n'Umukino w'Umupira w'amaguru wahuje ikipe y'Abakozi b'Akarere n'inzego z'umutekano, wabereye kuri Sitade ya Nyanza ukarangira amakipe yombi anganyije  1-1. Ni umunsi waranzwe n'ibyishimo no gusabana hagati y'abaturage na Police y'Igihugu ikorera mu Karere ka Nyanza.

Inzu yubakiwe Gatesi Chantal utaragiraga icumbi

Abayobozi batandukanye bitabiriye gahunda yo gutaha inzu ya Gatesi

Inzu zubatswe buri yose ifite ibyumba 3 kandi yujuje ibisabwa

ECD ya Kiruli yatangiye gukoreshwa kandi yujuje ibisabwa

Igice cy'inzu cyegereye ubwogero n'ubwiherero

Gutaha inzu ya Gatesi ku mugaragaro

Inzu zubakiwe abatishoboye zigaragara neza cyane

Abaturage benshi bitabiriye gahunda yo gutaha ibi bikorwa

ECD ya Kiruli winjira mu marembo yayo

Ubwitabire bw'abana kuri ECD Kiruli burashimishije