kimwe n'ahandi hose mu Gihugu, uyu munsi tariki ya 30 Werurwe 2019 mu Karere ka Nyanza hakozwe umuganda rusange usoza ukwezi kwa Werurwe 2019. Ku rwego rw'Akarere wabereye mu Murenge wa Muyira, Akagari ka Nyundo hitegurwa Kwibuka ku nshuro ya 25 jenoside yakorewe Abatutsi mu 1994. Hakaba hakozwe ibikorwa bitandukanye birimo gukuraho ibikoresho byifashishwaga mu kubaka urwibutso rushya rwa Nyamiyaga birimo ibiti n'amabuye,gusanza igitaka kiri hafi y'urwibutso ahazashyirwa ubusitani no gutunganya inzira zijya ku bwiherero.

Muri uyu muganda tukaba twifatanije na Perezida w'Inteko Ishinga Amategeko umutwe w'Abadepite Hon. Mukabalisa Donatile, Minisitiri w'urubyiruko Hon. Mbabazi Rosemary, Guverineri w'Intara y'Amajyepfo CG Gasana K.Emmanuel, Abadepite bagera kuri 19, inzego z’umutekano, abakozi ba Minisiteri y'urubyiruko, abajyanama, Komite Nyobozi n'abakozi b'Akarere, abagize AERG-GEARG ku rwego rw'Igihugu mu gikorwa cyabo ngarukamwaka bimara icyumweru, abarokotse jenoside bo mu Mayaga by'umwihariko muri Muyira, inama y'Igihugu y'urubyiruko n'abandi

Nyuma y'ijambo ry'ikaze ryatanzwe n'Umuyobozi w'Akarere wanashimiye abashyitsi baje kwifatanya n'Akarere, Guverineri w'Intara y'Amajyepfo yashimye abitabiriye bose iki gikorwa ashimangira imvugo ya Nyakubahwa Perezida wa Repubulika ko Abanyarwanda twahisemo kuba umwe. Yavuze kandi ko twese dufite ibyo tubazwa birimo gukundana, kubana neza, kunga ubumwe no kubaho neza.

Mu ijambo ry'umushyitsi mukuru, Perezida w'Inteko ishinga Amategeko umutwe w'Abadepite Hon. Mukabalisa Donatile yashimiye ingabo zari iza FPR-Inkotanyi zahagaritse jenoside anashima intera urwibutso rushya ruri kubakwa rugezeho. Yasoje ijambo rye ashima GAERG na AERG ku butwari bwabaranze kuva barokoka Jenoside n'uburyo bashyize imbaraga mu kwiga kugira ngo bakomeze gufasha barumuna babo.