Mu mirenge yose igize Akarere ka Nyanza hizihijwe Umunsi Mpuzamahanga w’Umugore wo mu Cyaro, ku bufatanye n’abafatanyabikorwa barimo Action Aid na BRAC. Ku rwego rw’Akarere, ibirori byabereye mu Murenge wa Mukingo ku nsanganyamatsiko igira iti: “Umugore ni uw’agaciro.”

Umushyitsi mukuru yari Bwana Kajyambere Patrick, Umuyobozi w’Akarere w’agateganyo, ari kumwe n’Umuyobozi w’Akarere wungirije ushinzwe imibereho myiza y’abaturage, Madame Kayitesi Nadine, Umuhuzabikorwa w’Inama y’Igihugu y’Abagore ku rwego rw’Intara y’Amajyepfo, Madame Benyirigira Diane, n’Umuhuzabikorwa w’Inama y’Abagore ku rwego rw’Akarere, Dr. Mukandori Denyse. Hari kandi n’inzego z’umutekano n’abandi bayobozi batandukanye.

Mu ijambo rye, Bwana Kajyambere Patrick yashimangiye ko umugore wo mu cyaro ari inkingi y’iterambere ry’igihugu, anashimira abafatanyabikorwa ku ruhare rwabo mu guteza imbere abagore. Yagize ati:

“Umugore wo mu cyaro ni moteri y’iterambere. Iyo umufashije, uba ufashije urugo, umuryango n’igihugu muri rusange. Ni yo mpamvu tugomba gukomeza kumushyigikira no kumuha amahirwe angana n’ay’abandi.”

Madame Benyirigira Diane, wari uhagarariye Inama y’Igihugu y’Abagore ku rwego rw’Intara y’Amajyepfo, yashimye ibikorwa bigaragaza uruhare rw’abagore mu iterambere ry’imiryango yabo. Yagize ati:

“Twishimira intambwe abagore bo mu cyaro bamaze gutera mu kwihangira imirimo no kubaka ubukungu bushingiye ku bumenyi n’indangagaciro. Tugomba gukomeza kubatera inkunga kugira ngo babashe kugira uruhare rukomeye mu iterambere ry’igihugu.”

Mu birori byaranzwe n’ibyishimo, hashimiwe abagore b’indashyikirwa mu byiciro bitandukanye, hatangwa inka 6 ku miryango iyobowe n’abagore harimo 4 zatanzwe na Action Aid ndetse n’imbabura 100 zorohereza imiryango gukoresha ibicanwa bike.

Dusenge Josée, umwe mu bagore b’indashyikirwa bahembwe, yashimwe ku bw’ubwitange bwe mu guhindura ubuzima bw’abandi. Yagize ati:

“Nashyize hamwe abagore bahoze bakora uburaya ndetse n’urubyiruko rwahoze mu buzererezi no kunywa ibiyobyabwenge, tubyara itsinda ryo kwiteza imbere. Ubu dufite konti iriho arenga 1,200,000 Frw, kandi twiyemeje gukomeza gutera imbere.”

Ibi birori byongeye kwibutsa ko gushyigikira umugore wo mu cyaro ari uguha imbaraga umuryango n’igihugu muri rusange, kuko iterambere ritagerwaho hatabayeho uruhare rufatika rw’abagore.

Umuyobozi w'Akarere ka Nyanza w'Agateganyo Kajyambere Patrick

Dusenge Josee, Umugore wakoze ibikorwa by'indashyikirwa mu Karere ka Nyanza