kuri iki cyumweru tariki ya 26 Gicurasi 2019, mu Karere ka Nyanza, umurenge wa Kibirizi ahitwa ku Ibambiro habereye umuhango wo kwibuka abagore n'abana bishwe muri jenoside yakorewe Abatutsi mu 1994 ku rwego rw'Igihugu. Umushyitsi mukuru akaba yari Prezidante w'Inteko Ishinga Amategeko Umutwe w'Abadepite Hon. Mukabalisa Donathile. Hari kandi Nyabahwa Minisitiri w'Uburinganire n'Iterambere ry'Umuryango Amb. Nyirahabimana Solina, Guverineri w'Intara y'Amajyepfo CG Emmanuel K. Gasana, Visi Prezidante wa Sena Hon. Jeanne d'Arc Gakuba, Umuyobozi w'Akarere Bwana Ntazinda Erasme, Umunyamabanga Nshingwabikorwa w'Inama y'Igihugu y'Abagore Madam Jacqueline Kamanzi, RPC ACP Jean Claude Kajeguhakwa, Ushinzwe Operations mu Ntara y'Amajyepfo Col. Nelson Rwigema, Umuyobozi wa RIB mu Ntara y'Amajyepfo Madam Kamarampaka Consolee,    Perezida wa AVEGA-AGAHOZO akaba ari nawe wari uhagarariye Ibuka Mukabayire Valerie,   Umuyobozi wa NECDP Dr. Anita Asiimwe, Umunyamabanga Nshingwabikorwa wa NCC  Madam Uwera Kanyamanza, Umuyobozi mukuru ushinzwe ubushakashatsi muri CNLG Dr Jean Damascene Gasanabo, abadepite n'abasenateri ndetse, abagize Inama Njyanama n'abandi bashyitsi benshi batandukanye.

                                                                  Abayobozi bari bitabiriye uyu muhango

Umuhango ukaba wabimburiwe no kunamira ndetse no gushyira indabo ku mva ishyinguyemo abagore n'abana, habayeho kumva ubutumwa butandukanye burimo ubwatanzwe mu ijambo ry'ikaze aho Umuyobozi w'Akarere yagaragaje uburyo abagore n'abana bari bizejwe kurindwa ariko bakicwa kinyamanswa, yagaye abakoze ayo mahano anashimira Inkotanyi zunamuye icumu jenoside igahagarara. Mu kiganiro cyatanzwe n'Umuyobozi ushinzwe ubushakashatsi muri CNLG Dr Jean Damascene Gasanabo yagarutse ku buryo ingengabitekerezo ya Jenoside yabibwe by'umwihariko muri Nyanza n'ahandi kugeza kuri jenoside yari igambiriye kurimbura Abatutsi.

Mu ijambo ry'umushyitsi mukuru, Hon. Mukabalisa Donathile, yavuze ko kwibuka bituma dusobanukirwa amateka twanyuzemo tugafata ingamba zituma bitazongera, duhangana n'abagifite ingengebitekerezo ya jenoside kandi ibimenyetso ntibisibangane.

               Perezidente w'inteko ishingamategeko umutwe w'abadepite ashyira indaho ku rwibutso

Yibukije urubyiruko gusigasira ibyagezweho bubaka u Rwanda rwiza ruzira jenoside. Yongeyeho ko ababyeyi bibukwa bari imfura zirangwa n'urukundo n'urugwiro bakaba baragira umwete n'umurava bityo babakaba badakwiye kwibagirana agaya ababishe urw'agashinyaguro by'umwihariko abagore bagize uruhare mu kwica bagenzi babo.yashimiye ingabo zari iza FPR-Inkotanyi zahagaritse jenoside ku isonga Nyakubahwa Perezida wa Repubulika Paul Kagame.