Kuri uyu wa Kabiri tariki 21 Nyakanga 2020, Guverineri mushya w’Intara y’Amajyepfo Madame KAYITESI Alice ari hamwe n’Umunyamabanga Nshingwabikorwa w’agateganyo w’Intara y’Amajyepfo Bwana Gakire Bob basuye Akarere ka Nyanza mu rwego rwo kumenya uko Akarere gahagaze muri rusange mu bukungu, imibereho myiza n’imiyoborere.

Yakiriwe n’Umuyobozi w’Akarere Bwana Ntazinda Erasme ari hamwe na Komite Nyobozi, Abagize Inama y’Umutekano itanguye ndetse n’abayobozi b’amashami mu Karere. Umuyobozi w’Akarere yagaragaje muri rusange imiterere y’Akarere ka Nyanza, icyerecyezo cy’Akarere, imishinga y’iterambere iri gushyirwa mu bikorwa harimo agakiriro, iteganyijwe ndetse n’ikeneye ubuvugizi.

Madamu Guverineri akaba yashimye icyerecyezo cy’Akarere ndetse n’imishinga ihari asezeranya Akarere gukora ubuvugizi kugira ngo iterambere ry’umuturage rirusheho kwihuta. Guverineri kandi yasuye icyumba ntangamakuru cy'ikoranabuhanga cy'Akarere, agakiririro kagezweho kari kubakwa mu mujyi wa Nyanza n’inganda 2 zatangiye kubakwa harimo uruzakora insinga z’amashanyarazi ndetse n’urw’amakaro ashima ko ari imishinga myiza y’iterambere izahindura ubuzima bw’abatuye Akarere ka Nyanza n’Intara muri rusange.

Yanaboneye ho kandi gusura Ingoro y’Umurage w’Amateka y’Abami mu Rukari asaba ko amateka n’umuco by’u Rwanda byarushaho kumenyekanishwa by’umwihariko mu banyarwanda bakarusha ho kuza kuhasura no kwiga amateka n’umuco.

Umuyobozi w'Akarere Ntazinda Erasme agaragaza uko Akarere gahagaze

Inzego zitandukanye zaje kwakira Guverineri

Guverineri yashimye icyumba ntangazamakuru cy'ikoranabuhanga

Imirimo yo kubaka agakiriro igeze ahashimishije

Yasuye ahari kubakwa uruganda rw'amakaro n'urw'insiga z'amashanyarazi

Guverineri yashimye aho agakiriro kageze kubakwa

Mu Rukari yishimiye inyambo

Basura Kambere

Ingoro y'Amateka y'Abami mu Rukari ni hamwe mu hantu habitse amateka