Ku bufatanye bwa Minisiteri y’Abakozi ba Leta n’Umurimo (MIFOTRA) n’Akarere ka Nyanza, tariki ya 7 Ugushyingo 2025 mu cyumba cy’inama cy’Akarere habaye inama igamije kugenzura ishyirwa mu bikorwa ry’imihigo ijyanye n’umushinga wo Kwigira ku Murimo.

Iyi nama yayobowe n’Umuyobozi w’Akarere w’Agateganyo, Bwana Kajyambere Patrick, yibanze ku isesengura ry’imyanzuro yavuye mu nama yiswe Provincial Platform yabereye mu Karere ka Huye ku wa 30 Gicurasi 2025, ndetse n’uruhare rw’inzego zitandukanye mu gushyigikira gahunda z’iterambere zishingiye ku kwihangira imirimo.

Abitabiriye inama bagarutse ku kamaro ko gukomeza gushyira imbaraga mu guteza imbere ubushobozi bw’urubyiruko, kongerera abaturage ubumenyi n’ubushobozi bwo kwihangira imirimo, no kunoza imikoranire hagati y’inzego za Leta n’iz’abikorera mu rwego rwo guteza imbere gahunda yo kwigira ku murimo.

Mu butumwa bwe, Bwana Kajyambere Patrick yashimangiye ko gahunda ya Kwigira ku Murimo ari umusingi w’iterambere rirambye kandi igamije gufasha urubyiruko no guteza imbere ubukungu bw’igihugu.

“Gahunda yo Kwigira ku Murimo ni igisubizo ku bushomere mu rubyiruko. Iyo dushyize imbaraga mu guha urubyiruko ubumenyi, ubufasha mu bucuruzi n’ubushobozi bwo kwihangira imirimo, tuba dushyira imbere ejo hazaza h’igihugu. Akarere ka Nyanza kazakomeza gushyira imbere ubufatanye n’inzego zitandukanye kugira ngo iyi gahunda igere ku ntego zayo,” — Kajyambere Patrick, Umuyobozi w’Akarere ka Nyanza w’agateganyo.

Abitabiriye inama basabwe gukomeza gukurikirana no gushyigikira ibikorwa bigamije guteza imbere imirimo ishingiye ku bumenyi, ubuhanga n’ikoranabuhanga, kugira ngo abaturage by’umwihariko urubyiruko bashobore kwiteza imbere binyuze mu mirimo y’inyamwuga n’udushya.