Guhera tariki 27 Ugushyingo 2023 kugeza tariki ya 1 Ukoboza 2023, mu Gihugu hose hatangijwe icyumweru cy'ibikorwa byahariwe  kwita ku buzima bw'umwana n'umubyeyi ku nsanganyamatsiko igira iti: "Hehe n'igwingira ry'umwana." Mu Karere ka Nyanza byatangirijwe ku Ishuri ribanza rya Gahanda mu murenge wa Busasamana, Akagari ka Rwesero.

Ni ibikorwa byatangijwe ku mugaragaro n'Umuyobozi w'Akarere wungirije ushinzwe imibereho myiza y'abaturage Madame Kayitesi Nadine ari kumwe n'Umuyobozi Mukuru w'Ibitaro bya Nyanza Dr Nkundibiza Samuel, Umuyobozi w'ishami ry'Ubuzima mu Karere Bwana Kabera Clement, Intumwa y'Ikigo cy'Igihugu gishinzwe Ubuzima, abakozi b'Akarere mu ishami ry'ubuzima, abakozi b'Ibitaro bya Nyanza, abafatanyabikorwa barimo Gikuriro Kuri Bose, ubuyobozi bw'Ishuri, Umuyobozi w'Ikigo nderabuzima cya Nyanza, abarezi, ababyeyi n'abandi.

Mu bikorwa biteganyijwe muri jiki cyumweru harimo kwita ku buzima bw'umubyeyi utwite, kunoza isuku n'imirere harimo gutegura no kugaburira abana indyo yuzuye, gupima imikurire y'abana, gutanga ibinini by'inzoka, kuboneza urubyaro n'ibindi bikorwa bigamije kurwanya igwingira mu bana bato.

Atangiza ibikorwa by'icyumweru cy'ubuzima bw'umwana n'umubyeyi, Umuyobozi w'Akarere ka Nyanza wungirije ushinzwe imibereho myiza Kayitesi Nadine yasabye abarezi, abayeyi n'abaturage bose muri rusange gushyira imbaraga mu bikorwa byose byateganyijwe kugira ngo hatazabo kwibeshya cyangwa hakagira umwana ucikanwa na serivisi zamugenewe. Yagize ati: " Babyeyi, twite ku buzima bw'abana bacu ariko ubuzima bw'umwana buhera ku mubyeyi. twitabire kwikingiza, kwipimisha kandi mu gihe dutwite dufate indyo yuzuye. Ntacyo dufite tuzabwira Imana niba nk'ababyeyi tutarabashije kurera neza abo twabyaye ahubwo bakagwingira."

Umuyobozi w'Akarere wungirije aha umwana ikinini cy'inzoka ku Ishuri ribanza rya Gahanda

Abarimu bafatanyije n'abayobozi gutangiza icyumweru cy'ubuzima bw'umwana n'umubyeyi kuri EP Gahanda

H

Umuyobozi wungirije w'Akarere ka Nyanza, Kayitesi Nadine aganira n'abarimu ba EP Gahanda mbere yo gutangiza igikorwa

Umuyobozi wa EP Gahanda aha umwana ikinini cy'inzoka

Abantu bakuru nabo bahawe ibini by'inzoka byo mu bwoko bwa paraziquantel