Mu rwego rwo kugaragaza urukundo, ubumuntu n’uruhare mu kubaka ubumwe n’ubwiyunge mu Rwanda, abakozi n’abayobozi b’Ikigo cy’Iterambere ry’Imari (BDF), bayobowe n’Umuyobozi Mukuru Bwana Munyeshyaka Vincent, basuye Intwaza zo mu rugo rw’Impinganzima rwa Nyanza ruherereye mu murenge wa Rwabicuma, Akagari ka Mushirarungu, kuri uyu wa kane. Iyi gahunda yateguwe mu rwego rwo kubafata mu mugongo no kubaba hafi muri ibi bihe byo Kwibuka ku nshuro ya 31 Jenoside yakorewe Abatutsi.

Bakiriwe na Madamu Kayitesi Nadine, Umuyobozi Wungirije w’Akarere ka Nyanza ushinzwe imibereho myiza, washimiye cyane abakozi ba BDF ku bw’iki gikorwa cy’indashyikirwa. Yagize ati:

"Mu gihe twibuka amateka mabi igihugu cyanyuzemo, ibikorwa nk’ibi bigaragaza ko u Rwanda rushya rishingiye ku rukundo, kwiyubaka no gufatana mu mugongo. Turashimira BDF ku bw'uyu mutima w’ubumuntu n’uruhare mu gusigasira agaciro k’ababyeyi bacu bacitse ku icumu."

Mu rugwiro n’urukundo rudasanzwe, abashyitsi basabanye n’Intwaza, banabashyikiriza impano zitandukanye zirimo ibiribwa, ibikoresho by’isuku n’ibindi bifasha mu buzima bwa buri munsi. Bwana Munyeshyaka Vincent, Umuyobozi Mukuru wa BDF, yavuze ko ibi atari ibikorwa byo kwigaragaza, ahubwo ari igice cy’ihame BDF yiyemeje ryo kuba hafi y’Abanyarwanda, cyane cyane abaciye mu mateka akomeye.

"Kwifatanya n’Intwaza ni igikorwa cy’ineza n’icyubahiro. Ni urugero rw’ukuntu dushobora gufasha kwiyubaka no kubaka igihugu gishingiye ku bumuntu, ubumwe n’amateka asigasirwa mu kuri," yatangaje Munyeshyaka.

Iki gikorwa ni icyunganira gahunda za Leta zo gufata mu mugongo abarokotse Jenoside, no kububakira icyizere cy’ejo hazaza hihanganisha kandi hubaka ubumwe bw’Abanyarwanda bose.