Tariki 21 Ukuboza 2026, mu mirenge yose igize Akarere ka Nyanza habaye igikorwa cya Siporo Rusange, cyahurije hamwe abaturage hagamijwe  gusigasira ubuzima bwabo no guteza imbere imibanire myiza. Iki gikorwa cyabaye umwanya wo kongera imbaraga mu mubiri, ariko kandi kiba urubuga rwo kwimakaza amahoro, isuku n’imyitwarire myiza mu baturage.

Umuyobozi w’Akarere ka Nyanza w’Agateganyo, Bwana Kajyambere Patrick, yifatanyije n’abaturage bo mu Murenge wa Busasamana mu myitozo ngororamubiri yabereye ku mbuga y’Akarere, ihuriza hamwe abaturage baturutse mu bice bitandukanye by’Umujyi wa Nyanza. Iki gikorwa cyagaragaje ubumwe n’ubufatanye bw’abaturage mu kwita ku buzima bwabo no kwitegura umwaka mushy awa 2026 bafite imbaraga.

Abitabiriye siporo bibukijwe ko gusigasira ubuzima bisaba imirire iboneye, gukora imyitozo ngororamubiri buri gihe, kwirinda ibiyobyabwenge no kwipimisha indwara zitandura. Hanabayeho igikorwa cyo gupima izi ndwara no gutanga ubujyanama ku kwita ku buzima, hagamijwe gufasha abaturage kwirinda no kwivuza hakiri kare.

Byongeye kandi, abaturage basabwe kwizihiza iminsi mikuru isoza umwaka mu ituze no mu mutekano, kwirinda gusesagura, gutanga serivisi nziza ku bakiliya no kurangwa n’isuku aho batuye, aho bakorera no ku mubiri. Siporo Rusange ya Bose yabaye isomo n’ishishikariza ry’uko gusigasira ubuzima ari inkingi y’iterambere rirambye n’imibereho myiza ya buri wese.