Mu rwego rwo kwibuka ku nshuro ya 31 Jenoside yakorewe Abatutsi mu 1994, ActionAid Rwanda yateguye igikorwa cyo kwibuka abari abakozi ba Aide et Action bazize Jenoside, igikorwa cyabereye mu Karere ka Nyanza ku rwego rw’Igihugu.

Iki gikorwa cyatangiye no gusura Urwibutso rwa Jenoside rwa Nyanza, aho abitabiriye bunamiye inzirakarengane zihashyinguye, banashyiraho indabo mu rwego rwo kubaha icyubahiro. Abitabiriye iki gikorwa banasobanuriwe amateka ya Jenoside muri aka Karere, hibandwa ku buryo yagize ingaruka zikomeye ku muryango nyarwanda n’imiryango muri rusange no mu Karere ka Nyanza by’umwihariko.

Ibikorwa byo kwibuka byakomereje mu Kagari ka Rwesero, ahabereye ibiganiro gutanga ubuhamya bw’abarokotse, ndetse hanatambutswe ubutumwa bunyujijwe mu ndirimbo z’umuhanzi Bonhomme.

Bwana Kamana Jean Marie, Umunyamabanga Nshingwabikorwa w’Akarere ka Nyanza, ni we wari umushyitsi mukuru. Mu ijambo rye yashimye uruhare rwa ActionAid Rwanda mu bikorwa byo kwibuka no kurwanya ingengabitekerezo ya Jenoside, agira ati:

"Kwibuka ni igikorwa kigamije kubaka ubumwe no gukomeza urugendo rwo kubaka u Rwanda rutarangwa n’urwango. Turashimira ActionAid Rwanda ku bufatanye n’abaturage mu kwimakaza ukuri n’ubwiyunge."

Iki gikorwa cyanitabiriwe n’abandi bayobozi barimo Perezida wa IBUKA mu Karere ka Nyanza, Bwana Niyitegeka Jean Baptiste, ndetse n’Umuyobozi wa AVEGA-AGAHOZO ku rwego rw’Akarere, hamwe n’abaturage b’Akagari ka Rwesero.

Abitabiriye bose bashimangiye ko kwibuka ari inshingano rusange kandi ko gukomeza kurwanya ingengabitekerezo ya Jenoside n’abayipfobya ari igihango gihoraho cy’Abanyarwanda bose

Bashyize indabo ku rwibutso rwa Jenoside yakorewe Abatutsi rw'Akarere ka Nyanza

Imbere y'Urwibutso rwa Jenoside Yakorewe Abatutsi rw'Akarere ka Nyanza

Igikorwa cyitabiriwe n'ingeri zinyuranye hamwe n'abaturage b'Akagari ka Rwesero

Kamana Jean Marie, Umunyamabanga Nshingwabikorwa w'Akarere ka Nyanza

Niyetegeka Jean baptiste, Perezida wa Ibuka mu Karere ka Nyanza