Mu midugudu yose igize Akarere ka Nyanza habaye ibirori by’umuganura by’akarango k’umuco nyarwanda, aho abaturage bishimiye kungukira ku byo bejeje no gusangira n’abataragize amahirwe yo kubona umusaruro uhagije. Ku rwego rw’Akarere, ibirori byabereye mu Gakenyeri kwa Musinga ku wa 1 Kanama 2025, byitabirwa n’abayobozi batandukanye barimo Umunyamabanga Nshingwabikorwa w’Intara y’Amajyepfo, Bwana Nshimiyimana Vedaste.

Ni umunsi w’ingenzi aho abaturage bo muri Nyanza bashimishijwe n’umwanya bahawe wo kumurika umusaruro wabo, kuganuza bagenzi babo batagize umusaruro uhagije, no guha abana amata mu rwego rwo kubatoza indangagaciro zo gusangira no kwita ku batishoboye. Muri ibi birori, hanitabiriye abajyanama mu nama njyanama y’Akarere, inzego z’umutekano n’abandi bayobozi batandukanye.

Madame Kayitesi Nadine, Umuyobozi w’Akarere Wungirije ushinzwe imibereho myiza y’abaturage, mu ijambo rye ry’ikaze yagize ati: “Duharanira kuba ku isonga mu ndangagaciro z’umuco wacu no guteza imbere ubukerarugendo bushingiye ku muco. Umunsi nk’uyu udukangurira gusigasira ibyiza by’abatubanjirije no gukomeza kuba abo turi bo.”

Umunyamabanga Nshingwabikorwa w’Intara y’Amajyepfo nawe yashimangiye ko Umuganura atari ibirori by’imikino gusa, ahubwo ari umurage w’Abanyarwanda ugomba gusigasirwa. Yagize ati: “Umuganura ni isoko y’indangagaciro, ubupfura n’urukundo rw’igihugu. Iyo tugize intege nke mu muco wacu, natwe twese turahungabana.”

Kwizihiza Umuganura wa 2025 byarushijeho kuryoha kuko byahujwe na gahunda ya Gikundiro ku Ivuko, aho amakipe ya Rayon Sports na Gasogi United basuye Ingoro y’Amateka y’Abami i Rukari ndetse banakina umukino wa gicuti kuri Sitade ya Nyanza. Uwo mukino warangiye Rayon Sports itsinze Gasogi United ibitego 2-0, bituma umunsi urangira mu byishimo bikomeye.

Ibi birori byasojwe n’igitaramo ndangamuco nyarwanda kimaze kwandika amateka cyizwi ku izina ry’ “I Nyanza Twataramye.” Kwizihiza Umuganura, byasize ubutumwa bukomeye bwo gusigasira umuco n’amateka, kwishimira ibyiza byagezweho no gukomeza gusangirira hamwe nk’Abanyarwanda bahuriye ku muco ubahuje.