Guhera tariki 6 kugeza tariki 7 Werurwe 2025, itsinda rya Komisiyo ya Sena y'Imibereho y'Abaturage n'Uburenganzira bwa Muntu riyobowe na Senateri Umuhire Adrie wari kumwe na Senateri Twahirwa André basuye Akarere ka Nyanza; bakirwa n’Umuyobozi w'Akarere wungirije ushinzwe imibereho myiza y’abaturage, Madame Kayitesi Nadine, wari kumwe n’Umuyobozi w’Ishami ry’Uburezi mu Karere ndetse n’Umukozi wa NESA mu Karere. Iyi Komisiyo yasuye amashuri ya Kavumu TSS na Hanika TSS.

Intego yari ukugenzura no guteza imbere amashuri y’imyuga n’ubumenyingiro, harebwa uko ahame ry’amahirwe angana ku banyeshuri bose ryubahirizwa, ndetse n’uburyo aya mashuri yitabwaho kugira ngo atange ubumenyi bufite ireme. Hanarebwe kandi uko ikoranabuhanga rikoreshwa mu gutanga amasomo, uko abanyeshuri batozwa indangagaciro mbonezamurimo n’uko amashuri afasha mu gukemura ikibazo cy’ibura ry’umurimo mu gihugu.

Mu biganiro byabereye muri ayo mashuri, Abasenateri bashimye ubwitange bw’abanyeshuri n’abarimu mu guteza imbere ubumenyi ngiro. Bashimangiye ko uburezi bw’imyuga n’ubumenyingiro ari inkingi ikomeye mu iterambere ry’igihugu, kuko butegura urubyiruko kugira uruhare mu bukungu binyuze mu guhanga umurimo no gukora kinyamwuga. Senateri Umuhire Adrie yagarutse ku kamaro k’ubushakashatsi no guhanga udushya, asaba abanyeshuri kudahera gusa ku byo abandi bakoze, ahubwo bagaharanira kugira uruhare mu kuvumbura no gutanga ibisubizo bishya ku bibazo byugarije sosiyete.

Yagize ati: "Nti mukwiye gusa kwiga ibyo abandi bakoze, ahubwo mukwiye gutinyuka guhanga ibishya no kuvumbura. Ahazaza ni ah’abashobora gutanga ibisubizo bishya ku bibazo biriho muri sosiyete yabo. Igihugu gikeneye urubyiruko rufite imitekerereze iteye imbere, rushobora guhanga udushya no gufasha mu iterambere ry’igihugu.”

Uru ruzinduko rwagaragaje ubushake bwa Sena mu guteza imbere uburezi bw’imyuga n’ubumenyingiro bufite ireme, bushobora gutegura urubyiruko rushoboye, rufite ubumenyi bugezweho, ndetse runafite ubushobozi bwo guhanga umurimo no gukemura ibibazo byugarije iterambere ry’igihugu

Basuye ishuri rya Hanika TSS bareba ibyo abanyeshuri bakora banaganira n'abayobozi

Abanyshuri biga ibijyanye n'ubwubatsi bagaragaje ko bahindura imyubakire bahereye aho biga

Abasenateri babanzaga kuganira n'ubuyobozi bw'ishuri bakumva ibibazo bafite ndetse n'ibyagezweho

Abanshuri biga amashanyarazi bagaragaje umushinga wafasha abana bavuka batageze igihe bakamara igihe kwa muganga

Basuye abanyeshuri biga ibjyanye no gukora no gukanika imodoka

Bagiranye ibiganiro n'abayobozi b'amashuri y'imyuga n'ubumenyingiro

Senateri Twahirwa Andre bahaye inama z'ibyo bakosora bigafasha kuzamura ireme ry'imyigishirize