Tariki ya 24 Ukwakira 2021, ku Itorero rya ADEPR Nyanza habereye igikorwa cyo gusoza urugendo rw'isanamitima , ubumwe n'ubwiyunge muri gahunda y'ukwezi kwahariwe ibikorwa by'ubumwe n'ubwiyunge ku nsanganyamatsiko igira iti: "Ndi Umunyarwanda mu murage w'Abadaheranwa". Ni urugendo rwasojwe n'abantu 355 harimo abagize uruhare muri jenoside yakorewe Abatutsi mu 1994 bagera ku 100 basabye imbabazi bakemera icyaha. Harimo kandi urubyiruko 90 ndetse n'abarokotse jenoside yakorewe Abatutsi batanze imbabazi. 

Ni gahunda zaranzwe n'ijambo ry'Imana rigaruka ku kamaro k'imbabazi mu mibanire n'ubwiyunge, ubuhamya bw'abakize bw'abakoze urugendo rw'isanamitima basabye imbabazi  n'abakize ibikomere bagatanga imbabazi ku babahemukiye n'impanuro z'abayobozi batandukanye.

Iyi gahunda yitabiriwe n'abayobozi batandukanye mu Itorero rya ADEPR bayobowe n'Umuvugizi w'Itorero Rev. Past. Ndayizeye Isaie ndetse n'abahagarariye andi madini n'amatorero mu Karere ka Nyanza. Akarere ka Nyanza kari gahagarariwe n'Umuyobozi w'Imirimo rusange Bwana Nkurunziza Enock naho mu nzego z'umutekano hari Umuyobozi wa Polisi mu Karere SP Evode Nkurunziza.

Ubutumwa bwatanzwe bwagarutse ku ruhare  rw'inyigisho z'isanamitima mu kubanisha abanyarwanda by'Umwihariko Umuyobozi w'Imirimo Rusange mu Karere yashimiye Itorero rya ADEPR ndetse n'amadini n'amatorero mu bumwe n'ubwiyunge kuko ari byo u Rwanda rwubakiyeho asaba abamaze kubohoka gifasha bagenzi babo bataratangira urugendo naho umuvugizi wa ADEPR we akaba yavuze ko ikigikorwa kigomba gukwira hose. Abafashamyumvire muri iki gikorwa bakaba bahawe ibyemezo by'ishimwe (Certificates). Byagenze neza.

Abagize uruhare muri jenoside basabye imbabazi bapfukamye

Urubyiruko narwo rwitabira iyi gahunda y'isanamitima

Umuyobozi w'imirimo rusange mu Karere yashimye Itorero rya ADEPR ku kubanisha Abanyarwanda

Abafashamyumvire mu bumwe n'ubwiyunge barashimiwe

Abarokotse Jenoside bakize ibikomere bababarira ababiciye