Tariki 18 Gashyanyare 2025, Umuyobozi w’Akarere ka Nyanza, Bwana Ntazinda Erasme, ari kumwe n’inzego z’umutekano mu Karere, yakiriye abanyeshuri b’Ishuri Rikuru rya Polisi y’u Rwanda riherereye mu Karere ka Musanze. Aba banyeshuri bari baje mu rugendoshuri rugamije kumenya uko Polisi ifatanya n’ubuyobozi bw’inzego zegereye abaturage mu gukemura ibibazo bibangamira imibereho myiza y’abaturage. Uru rugendo rwari rugamije no gusangira ubunararibonye ku mikoranire y’inzego zitandukanye mu gukomeza iterambere ry’umutekano n’imibereho myiza.

Aba banyeshuri baturutse mu bihugu icyenda ari byo: Botswana, Malawi, Lesotho, Namibia, Somalia, South Sudan, Central African Republic, Kenya, n’u Rwanda. Mu gusura ibikorwa bitandukanye, bagaragaje ko bashimye uburyo Polisi y’u Rwanda ifatanya n’inzego z’ibanze mu guteza imbere umutekano n’imibereho myiza y’abaturage.

Mu rwego rwo kwigira ku bikorwa bifatika, basuye Koperative Indatezuka igizwe n’abavuye mu bigo ngororamuco, bafashijwe na Polisi kwiteza imbere binyuze mu mushinga w’amagare 40. Iyi koperative yerekanye uko ubufatanye bwa Polisi n’inzego z’ibanze bushobora gufasha abantu kongera kwinjira mu muryango mugari no kwiteza imbere.

Nyuma yaho, basuye Urugo Mbonezamikurire (ECD) rwa Kiruli mu murenge wa Mukingo, rukaba rwarubatswe ku bufatanye na Polisi, hagamijwe gufasha abana bato kugira ahantu heza ho kwiga no gukura neza. Iki gikorwa cyagaragaje uburyo Polisi y’u Rwanda itekereza ku iterambere ry’imibereho myiza y’abaturage, cyane cyane abana, bagenerwa uburere bwiza bushingiye ku ndangagaciro z’igihugu.

Mu kiganiro cyabaye nyuma y’uru ruzinduko, aba bapolisi bagaragaje ko u Rwanda ari icyitegererezo mu bufatanye bwa Polisi n’abaturage mu guteza imbere umutekano.

Umuyobozi w’Akarere ka Nyanza, Bwana Ntazinda Erasme, yashimangiye ko imikoranire ya Polisi n’inzego z’ibanze ari inkingi ya mwamba mu gukemura ibibazo by’abaturage. Yagaragaje ko ubufatanye bw’inzego zitandukanye ari ingenzi mu kubaka umutekano urambye no kuzamura iterambere ry’igihugu.

Uru rugendoshuri rwatanze umusaruro ufatika mu gusangiza ubunararibonye no guteza imbere ubufatanye bw’inzego z’umutekano n’abaturage, bikaba ikimenyetso ko imikorere myiza ya Polisi y’u Rwanda ishobora kuba isomo rikomeye ku mahanga.

Bagaragarijwe ibikorwa ku bufatanye bw'Akarerere na Police

 Basuye ECD ya Kiruli yubatswe ku bufatanye na Police y'u Rwanda

ABishimanye n'abana barererwa muri ECD ya Kiruli

Kuri ECD bahafatiye ifoto y'urwibutso

Basuye Koperative Indatezuka ya Busasamana igizwe n'abavuye mu bigo ngororamuco

Koperative Indatezuka ni urugero rw'ibishoboka nyuma ko yo kugororwa umuntu yatera imbere