Mu cyumba cy’inama cy’Akarere ka Nyanza habereye inama yahuje abayobozi b’amadini n’amatorero ku rwego rw’Akarere n’imirenge, hamwe n’abakozi bashinzwe ubuzima n’isuku ku rwego rw’imirenge. Iyi nama yayobowe na Madamu Kayitesi Nadine, Umuyobozi w’Akarere Wungirije Ushinzwe Imibereho Myiza y’Abaturage. Intego nyamukuru yari ukurebera hamwe uko hashyirwa imbaraga mu kwimakaza isuku n’isukura mu ngo no mu baturage muri rusange, nk’urufunguzo rwo kurwanya indwara ziterwa n’umwanda n’ibyorezo byibasira imibereho y’abaturage.

Abitabiriye inama baganiriye ku ngamba zitandukanye zo kunoza isuku, gukemura ibibazo byagaragajwe, gukemura ibibazo bibangamiye imibereho y’abaturage ndetse no guhuriza hamwe ubushobozi bw’inzego za Leta n’amadini mu gufasha abaturage mu buryo bufatika. Hafashwe imyanzuro y’uko bitarenze tariki ya 22 Gicurasi 2025, amadini n’amatorero azaba yamaze kugirana ibiganiro n’ubuyobozi bw’imirenge, bigamije gutanga ibisubizo byimbitse ku bibazo byagaragajwe mu isuku n’isukura.

Hashyizweho gahunda y’imiganda yihariye izibanda ku gukemura ibibazo by’ingenzi biri mu ngo, ndetse hategurwe urutonde rw’abaturage bagomba gufashwa n’amadini n’amatorero kugira ngo ibikorwa bizagire impinduka zigaragara. Abitabiriye inama bemeranyije ko hakenewe ubukangurambaga buhamye buzafasha guhindura imyumvire y’abaturage ku bijyanye n’isuku, binyuze mu nyigisho, ubufatanye n’uburere butangwa mu nsengero no mu bindi bikorwa by’iyobokamana.

Ikindi cyagarutsweho ni uruhare rw’ababyeyi mu burere bw’abana, basabwa kubatoza indangagaciro z’ubunyarwanda zirimo ubupfura, kwirinda ibiyobyabwenge, ingengabitekerezo ya Jenoside n’izindi ngeso mbi zishobora kubangamira ejo hazaza h’igihugu. Hatanzwe n’impanuro z’uko abaturage bakangurirwa gukora, kwihangira imirimo no gukorera hamwe kugira ngo barandure burundu ubukene n’imibereho itajyanye n’igihe.

Mu butumwa bwe, Madamu Kayitesi Nadine yagaragaje akamaro k’iyi nama n’uruhare rwa buri wese mu rugendo rwo guteza imbere imibereho myiza. Yagize ati: “Isuku si igikorwa, ni umuco. Iyo ititaweho, ubuzima busubira inyuma. Iyo ishyigikiwe, irubaka.” Ubutumwa bwe bwakiriwe n’abitabiriye inama nk’ihamagarwa rihamye ku mpinduka zishingiye ku bwitange, ubufatanye no gukunda igihugu.