Umuyobozi w’Akarere ka Bwana Ntazinda Erasme, ari kumwe n’Umunyamabanga Nshingwabikorwa w’Akarere, Bwana Kamana Jean Marie, bayoboye ibiganiro kuri Ndi Umunyarwanda byahawe abakozi bose bakorera ku cyicaro cy'Akarere. Ni ibiganiro byatanzwe na Bwana Mayobera Omer, Umukozi wa International Alert afatanyije na Madame Mahoro Emmanuella ushinzwe isanamitima muri ADEPR ku rwego rw'Igihugu.

Ibi biganiro byateguwe hagamijwe gushimangira ubumwe n'ubudaherwa, kwiyubaka ku buryo bwimbitse no kurushaho gusigasira indangagaciro z’ubumwe n’ubufatanye hagamijwe iterambere ry'Umiryango Nyarwanda.  

Umukozi wa Alert International Bwana Omer Mayobera yatanze ikiganiro ku buryo Ndi Umunyarwanda ishingiye ku bumenyi bw’amateka, ubumwe, n’ubudaheranwa bw’Abanyarwanda mu guhangana n’ingaruka z’amateka mabi ya Jenoside yakorewe Abatutsi mu 1994. Yagaragaje ko kumenya aho tuvuye, duhagaze, imbogamizi, umwihariko w'ibikomere bitarakira n'uburyo byakira ari ngombwa mu rugendo rwo gusana umubano n’iterambere ry’Igihugu.

Madamu Mahoro Emmanuella yasangije abitabiriye uburyo isanamitima rikwiye kuba igice cy’ingenzi cya Ndi Umunyarwanda aho yibanze ku buryo ubumwe n’ubudaheranwa byubakirwa ku gusabana imbabazi, kubabarirana no kurushaho kubaka icyizere mu mibanire y’abakozi n’abandi banyarwanda muri rusange. 

Habayeho kandi kuganira hagati y’abakozi ku mateka banyuzemo, uburyo yagiye n’aho bageze biyubaka ubwabo muri rusange. Ibi biganiro byatumye buri wese agaragaza uko yibona mu rugendo rwo kwiyubaka no kongera kubaka icyizere hagati ye na bagenzi be.

Mu ijambo rye risoza, Umuyobozi w’Akarere, yashimiye abakozi bose ku buryo bitabiriye ibiganiro, anabasaba gukomeza kwimakaza ubumwe no gushyira mu bikorwa ibyo bungutse. Yagaragaje ko Ndi Umunyarwanda ni urugendo twese tugomba gukora ndetse ikaba ubuzima dukwiriye kubaho, kugira ngo dutere imbere yaba umuntu ku giti cye, Akarere ndetse n'Igihugu. Yasoje yibutsa ko indangagaciro zo gukorera hamwe no gutanga serivisi nziza arizo zizabafasha kugera ku twihaye nk'Abanyarwanda.

Abakozi bose bari bitabiriye ibiganiro bya Ndi Umunyarwanda

Abakozi batandukanye bakorera ku cyicaro cy'Akarere bose barabyishimiye