Kuri College Christ Roi habereye inama rusange y’Inama y’Igihugu y’Abagore  y’Akarere ka Nyanza, iyoborwa n’Umuhuzabikorwa wayo Dr. Mukankusi Denise. Yitabiriwe na Hon. Depite Uwumuremyi Marie Claire nk’Umushyitsi Mukuru, Umuyobozi w’Akarere w’Agateganyo Bwana Kajyambere Patrick, n’Umuyobozi w’Inama Njyanama y’Akarere Madamu Mukagatare Judith, hamwe n’abandi bayobozi n’abahagarariye inzego z’abagore.

Hibanzwe  ku ishyirwa mu bikorwa ry’imihigo y’umwaka wa 2024/2025 no gusinya imihigo mishya ya 2025/2026. Hatanzwe ibiganiro bitandukanye birimo inshingano z’Inyabutatu, amahirwe yo guteza imbere ubuhinzi, ubworozi n’imishinga iciriritse, ndetse n’uruhare rw’Ikigega BDF mu gukura imiryango mu bukene.

Hon. Uwumuremyi Marie Claire yasabye abagore kwigira ku nshingano zabo nk’abafasha mu kubaka umuryango, ariko by’umwihariko bakagira uruhare mu iterambere ry’akarere n’igihugu. Yagize ati: “Umugore ni inkingi mu gukemura ibibazo by’imiryango no gukumira amakimbirane. Dukwiye kubaho duharanira kuba intangarugero, tukaba ‘Nkore neza bandebereho’ mu bikorwa byose bya buri munsi.”

Umuyobozi w’Akarere w’Agateganyo, Bwana Kajyambere Patrick, yashimye uruhare rukomeye rw’abagore mu iterambere ry’Akarere ka Nyanza, ashimangira ko ubuhinzi n’ubworozi ari urufunguzo rwo kurandura ubukene. Yagize ati: “Iyo umugore ashyize imbaraga mu buhinzi n’ubworozi, ni umuryango wose uba utekanye. Niyo mpamvu dukeneye gushyira hamwe kugira ngo twubake Nyanza yihaza mu biribwa kandi iteza imbere abaturage bayo.”