Tariki 4 Ukuboza 2025, mu Murenge wa Rwabicuma, Akagari ka Mushirarungu, hizihirijwe Umunsi wahariwe Ingo Mbonezamikurire y’Abana Bato mu Karere ka Nyanza. Iki gikorwa cyateguwe ku bufatanye bwa BRAC na Dufatanye Organization, cyitabiriwe n’ababyeyi, abayobozi n’abafatanyabikorwa batandukanye. Umushyitsi mukuru yari Madamu Kayitesi Nadine, Umuyobozi w’Akarere wungirije ushinzwe imibereho myiza y’abaturage.

Insanganyamatsiko y’uyu munsi yagiraga iti: “Ingo Mbonezamikurire, Igicumbi cy’Iterambere ry’Umwana Twifuza.”  Hagaragajwe ko ECD atari serivisi gusa, ahubwo ari ishingiro ry’iterambere rirambye, aho umwana ahabwa intangiriro nziza mu ndyo yuzuye, uburere, ubuzima n’imibanire myiza.

Umunsi waranzwe n’ibikorwa byubaka umuryango harimo umukino w’umupira w’amaguru wahuje Utugari twa Mushirarungu na Gacu aho Mushirarungu yatsinze Gacu ibitego 2–1, ibiganiro ku ndyo yuzuye n’igikorwa cyo kugaburira abana, ikinamico y’abajyanama b’ubuzima, gutera ibiti by’imbuto ku ECD y’Umudugudu wa Nyamiyaga muri Gacu, ndetse no guhemba ECD yitwaye neza.

Mu ijambo rye, Madamu Kayitesi Nadine yashimye uruhare rw’abafatanyabikorwa mu guteza imbere gahunda z’imbonezamikurire y’abana bato, asaba ababyeyi gukomeza kwitabira gahunda za Leta zibafasha kurera neza no kurinda abana. Yashimangiye ko ECD ari urufunguzo rw’iterambere rirambye ry’igihugu.